ਸਾਬਕਾ ਫੌਜੀ ਅਫਸਰਾਂ ਵੱਲੋਂ ਨਿਖੇਧੀ

ਸਾਬਕਾ ਫੌਜੀ ਅਫਸਰਾਂ ਵੱਲੋਂ ਪਾਟਕ-ਪਾਊ ਹਰਬਿਆਂ ਦੀ ਨਿਖੇਧੀ
ਨਵੀਂ ਦਿੱਲੀ- 114 ਸਾਬਕਾ ਫੌਜੀ ਅਫਸਰਾਂ ਵੱਲੋਂ ਹੁਣ ਘੱਟ ਗਿਣਤੀਆਂ 'ਤੇ ਹੋ ਰਹੇ ਹਮਲਿਆਂ ਅਤੇ ਵਿਚਾਰਾਂ ਦੀ ਆਜ਼ਾਦੀ 'ਤੇ ਮੜ੍ਹੀਆਂ ਜਾ ਰਹੀਆਂ ''ਪਾਬੰਦੀਆਂ'' ਖਿਲਾਫ ਨਾਖੁਸ਼ੀ ਦਾ ਇਜ਼ਹਾਰ ਕਰਦਿਆਂ, ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਸਾਰੇ ਸੂਬਿਆਂ ਦੇ ਮੁੱਖ ਮੰਤਰੀਆਂ ਨੂੰ ਖੁੱਲ੍ਹੀ ਚਿੱਠੀ ਲਿਖੀ ਗਈ ਹੈ।
ਇਹਨਾਂ ਸਾਬਕਾ ਫੌਜੀ ਅਫਸਰਾਂ ਵਿੱਚ ਐਡਮਿਰਲ ਐਲ. ਰਾਮਦਾਸ, ਮੇਜਰ ਜਨਰਲ ਦਿਪੰਕਰ ਬੈਨਰਜੀ, ਮੇਜਰ ਜਨਰਲ ਐਮ.ਪੀ. ਐਸ. ਕੰਡਲ ਵੀ ਸ਼ਾਮਲ ਸਨ। ''ਇਹ ਚਿੱਠੀ ਲਿਖਣਾ ਸਾਡੇ ਲਈ ਨਾ-ਖੁਸ਼ਗਵਾਰ ਹੈ ਪਰ ਮੌਜੂਦਾ ਘਟਨਾਵਾਂ ਵੱਲੋਂ ਸਾਨੂੰ ਸਾਡੇ ਮੁਲਕ ਵਿੱਚ ਫੈਲ ਪਸਰ ਰਹੇ ਪਾਟਕ-ਪਾਊਪੁਣੇ ਬਾਰੇ ਆਪਣਾ ਅਫਸੋਸ ਸਾਹਮਣੇ ਲਿਆਉਣ ਲਈ ਮਜਬੂਰ ਕੀਤਾ ਗਿਆ ਹੈ।'' ''ਅਸੀਂ 'ਨਾਟ ਇਨ ਮਾਈ ਨੇਮ' ਮੁਹਿੰਮ ਨਾਲ ਖੜ੍ਹਦੇ ਹਾਂ, ਜਿਸ ਵੱਲੋਂ ਮੁਲਕ ਭਰ ਅੰਦਰ ਡਰ-ਭੈਅ, ਧਮਕਾਉਣ, ਨਫਰਤ ਅਤੇ ਸੰਸੇ-ਸ਼ੰਕਿਆਂ ਭਰੇ ਮੌਜੂਦਾ ਮਾਹੌਲ ਖਿਲਾਫ ਹਜ਼ਾਰਾਂ ਨਾਗਰਿਕਾਂ ਨੂੰ ਲਾਮਬੰਦ ਕੀਤਾ ਗਿਆ ਹੈ।'' ਕੁੱਝ ਸੂਬਿਆਂ ਵਿੱਚ ਕਾਤਲਾਨਾ ਵਾਰਦਾਤਾਂ ਖਿਲਾਫ ਵਿੱਢੀ ਇਹ ਮੁਲਕ ਵਿਆਪੀ ਮੁਹਿੰਮ ਪਿਛਲੇ ਮਹੀਨੇ ਆਰੰਭੀ ਗਈ ਸੀ।
ਉਹਨਾਂ ਵੱਲੋਂ ਕਿਹਾ ਗਿਆ ਹੈ ਕਿ ਮੁਲਕ ਅੰਦਰ ਹਿੰਦੂਵਾਦ ਦੇ ਆਪੂੰ ਸਜੇ ਪਹਿਰੇਦਾਰਾਂ ਵੱਲੋਂ ਪਹਿਲੋਂ ਕਦੇ ਵੀ ਨਾ ਦੇਖੇ-ਸੁਣੇ ਗਏ ਹਮਲਿਆਂ ਨੂੰ ਅੰਜਾਮ ਦਿੱਤਾ ਗਿਆ ਹੈ। ਉਹਨਾਂ ਵੱਲੋਂ ਅਜਿਹੇ ਹਮਲਿਆਂ, ਵਿਸ਼ੇਸ਼ ਕਰਕੇ ਮੁਸਲਮਾਨਾਂ ਅਤੇ ਦਲਿਤਾਂ ਨੂੰ ਇਹਨਾਂ ਹਮਲਿਆਂ ਦਾ ਨਿਸ਼ਾਨਾ ਬਣਾਉਣ ਦੀ ਨਿਖੇਧੀ ਕੀਤੀ ਗਈ ਹੈ। ਇਹਨਾਂ ਸਾਬਕਾ ਫੌਜੀ ਅਫਸਰਾਂ ਵੱਲੋਂ ਆਖਿਆ ਗਿਆ ਹੈ ਕਿ ਮੀਡੀਆ ਠਿਕਾਣਿਆਂ, ਸਿਵਲ ਸੁਸਾਇਟੀ ਗਰੁੱਪਾਂ, ਯੂਨੀਵਰਸਿਟੀਆਂ ਅਤੇ ਵਿਦਵਾਨਾਂ 'ਤੇ ਰਾਸ਼ਟਰ-ਵਿਰੋਧੀ ਹੋਣ ਦਾ ਠੱਪਾ ਲਾਇਆ ਗਿਆ ਹੈ ਅਤੇ ਇਹਨਾਂ ਨੂੰ ਹਿੰਸਾ ਦਾ ਸ਼ਿਕਾਰ ਬਣਾਇਆ ਗਿਆ ਹੈ। ਰਾਜ ਵੱਲੋਂ ਇਸ ਸਭ ਕੁੱਝ ਤੋਂ ਅੱਖਾਂ ਬੰਦ ਕੀਤੀਆਂ ਹੋਈਆਂ ਹਨ। ''ਅਸੀਂ ਹੁਣ ਹੋਰ ਅੱਖਾਂ ਬੰਦ ਨਹੀਂ ਰੱਖ ਸਕਦੇ। ਜੇ ਅਸੀਂ ਹੁਣ ਵੀ ਨਾ ਖੜ੍ਹੇ ਹੋਏ ..... ਤਾਂ ਅਸੀਂ ਸਾਡੇ ਮੁਲਕ ਨੂੰ ਨੁਕਸਾਨ ਪੁਚਾਉਣ ਦੇ ਭਾਗੀ ਬਣ ਰਹੇ ਹੋਵਾਂਗੇ।''
(''ਦ ਹਿੰਦੂ'' 31 ਜੁਲਾਈ 2017)