ਚਾਰ ਮਾਓਵਾਦੀ ਮਾਰ ਕੇ ਮਾਰਕਸੀ ਪਾਰਟੀ ਭਾਜਪਾ ਦੇ ਰਾਹ ਤੁਰੀ

ਚਾਰ ਮਾਓਵਾਦੀ ਝੂਠੇ ਪੁਲਸ ਮੁਕਾਬਲੇ ਵਿੱਚ ਮਾਰ ਕੇਕੇਰਲਾ 'ਚ ਮਾਰਕਸੀ ਪਾਰਟੀ ਭਾਜਪਾ ਦੇ ਰਾਹ ਤੁਰੀ

28 ਅਤੇ 29 ਅਕਤੂਬਰ ਨੂੰ ਕੇਰਲਾ ਦੇ ਪਲੱਕਮ ਜ਼ਿਲ੍ਹੇ ਦੇ ਅੱਟਾਪੱਡੀ ਜੰਗਲਾਂ ਵਿੱਚ ਭਾਰਤੀ ਕਮਿਊਨਿਸਟ ਪਾਰਟੀ (ਮਾਰਕਸੀ) ਦੀ ਅਗਵਾਈ ਵਾਲੀ ਖੱਬੇ ਜਮਹੂਰੀ ਮੋਰਚੇ ਦੀ ਸਰਕਾਰ ਨੇ 4 ਮਾਓਵਾਦੀਆਂ ਨੂੰ ਝੂਠੇ ਪੁਲਸ ਮੁਕਾਬਲੇ ਵਿੱਚ ਕਤਲ ਕੀਤਾ ਹੈ। ਕੇਰਲਾ ਦੀ ਪੁਲਸ ਦੇ ਥੰਡਰ ਬੋਲਟ ਕਮਾਂਡੋਆਂ ਨੇ ਇਸ ਮੁਕਾਬਲੇ ਨੂੰ ਸਿਰੇ ਚਾੜ੍ਹਿਆ। ਇਹ ਥੰਡਰ ਬੋਲਟ ਕਮਾਂਡੋ ਕੇਰਲਾ ਹਕੂਮਤ ਨੇ ਮਜ਼ਦੂਰਾਂ ਅਤੇ ਕਿਸਾਨਾਂ  ਦੇ ਘੋਲਾਂ ਨੂੰ ਕੁਚਲਣ ਲਈ ਵਿਸ਼ੇਸ਼ ਤੌਰ 'ਤੇ ਤਿਆਰ ਕੀਤੇ ਹਨ। ਪੁਲਸ ਨੇ ਦਾਅਵਾ ਕੀਤਾ ਹੈ ਕਿ ਇਹ ਮਾਓਵਾਦੀ ਕਾਬਾਨੀ ਦਾਲਮ ਦੇ ਮੈਂਬਰ ਸਨ, ਜਿਹੜਾ ਕਿ ਸੂਬੇ ਦੀ ਕਬਾਇਲੀ ਖੇਤਰਾਂ ਵਿੱਚ ਆਪਣੇ ਪੈਰ ਜਮਾਉਣ ਦੀ ਤਾਕ ਵਿੱਚ ਸੀ। ਇਸ ਮੁਕਾਬਲੇ ਵਿੱਚ ਮਾਰੀ ਗਈ ਔਰਤ ਦਾ ਨਾਂ ਜੋਤੀ ਹੈ ਜੋ ਕਿ ਕਰਨਾਟਕਾ ਤੋਂ ਹੈ ਅਤੇ ਮਾਰੇ ਗਏ ਇੱਕ ਵਿਅਕਤੀ ਦਾ ਨਾਂ ਕਾਰਤਿਕ ਹੈ ਜੋ ਕਿ ਤਾਮਿਲਨਾਡੂ ਦਾ ਵਸਨੀਕ ਹੈ, ਬਾਕੀ ਦੋਹਾਂ ਦੀ ਪਛਾਣ ਨਹੀਂ ਹੋ ਸਕੀ।
ਜਮਹੂਰੀ ਹੱਕਾਂ ਦੀਆਂ ਜਥੇਬੰਦੀਆਂ ਦੇ ਕਾਰਕੁੰਨਾਂ ਦਾ ਕਹਿਣਾ ਹੈ ਕਿ ਇਹ ਇੱਕ ਝੂਠਾ ਪੁਲਸ ਮੁਕਾਬਲਾ ਹੈ, ਸੀ.ਪੀ.ਐਮ. ਨੇ ਕੇਰਲਾ ਵਿੱਚ ਭਾਰੂ ਜਾਗੀਰੂ ਜਮਾਤ ਦਾ ਥਾਪੜਾ ਹਾਸਲ ਕਰਨ ਖਾਤਰ ਇਹ ਕਾਂਡ ਰਚਾਇਆ ਤਾਂ ਕਿ 2021 ਦੀ ਸੂਬਾਈ ਹਕੂਮਤ ਵਿੱਚ ਆਪਣੀ ਕੁਰਸੀ ਸਲਾਮਤ ਰੱਖੀ ਜਾ ਸਕੇ। ਖੱਬੇ ਮੋਰਚੇ ਵਿੱਚ ਸ਼ਾਮਲ ਭਾਰਤੀ ਕਮਿਊਨਿਸਟ ਪਾਰਟੀ ਦੇ ਸੂਬਾ ਸਕੱਤਰ ਕਨਾਮ ਰਾਜੇਂਦਰਨ ਨੇ ਇਸ ਮੁਕਾਬਲੇ ਦੀ ਇਹ ਕਹਿੰਦੇ ਹੋਏ ਜ਼ੋਰਦਾਰ ਨਿਖੇਧੀ ਕੀਤੀ ਹੈ, ''ਪੁਲਸ ਨੇ ਮਾਓਵਾਦੀਆਂ ਦੇ ਟੈਂਟ ਵਿੱਚ ਉਦੋਂ ਬਹੁਤ ਨੇੜਿਉਂ ਗੋਲੀਆਂ ਮਾਰੀਆਂ, ਜਦੋਂ ਉਹ ਰੋਟੀ ਖਾ ਰਹੇ ਸਨ। ਬਜ਼ੁਰਗ ਮਾਓਵਾਦੀ ਮਨੀਵਾਸਾਕਮ ਦੀ ਹਾਲਤ ਤਾਂ ਅਜਿਹੀ ਸੀ ਕਿ ਉਸ ਤੋਂ ਤੁਰਿਆ ਵੀ ਨਹੀਂ ਜਾਂਦਾ। ਇਸ ਝੂਠੇ ਪੁਲਸ ਮੁਕਾਬਲੇ ਦੀ ਅਦਾਲਤੀ ਜਾਂਚ ਹੋਣੀ ਚਾਹੀਦੀ ਹੈ। ਸਾਨੂੰ ਭਰੋਸੇਯੋਗs sਸੂਚਨਾ ਮਿਲੀ ਹੈ ਕਿ ਇਹ ਮੁਕਾਬਲਾ ਝੂਠਾ ਸੀ। ਥੰਡਰਬੋਲਟ ਵੱਲੋਂ ਕੀਤੇ ਕਤਲਾਂ ਨੂੰ ਕਿਵੇਂ ਵੀ ਵਾਜਬ ਨਹੀਂ ਠਹਿਰਾਇਆ ਜਾ ਸਕਦਾ।'' ਜਦੋਂ ਕਿ ਮੁੱਖ ਮੰਤਰੀ ਪਿਨਾਰਿਆਈ ਵਿਜੈਆਨ ਨੇ ਆਖਿਆ ਹੈ ਕਿ ਪੁਲਸ ਨੇ ਮਾਓਵਾਦੀਆਂ ਨੂੰ ਆਪਣੀ ਸਵੈ-ਰੱਖਿਆ ਵਜੋਂ ਮਾਰਿਆ ਹੈ। 
ਹਾਈਕੋਰਟ ਦੇ ਰਿਟਾਇਰਡ ਜੱਜ ਕੇਮਲ ਪਾਸ਼ਾ ਨੇ ਇਹ ਦੋਸ਼ ਲਾਇਆ ਹੈ ਕਿ ਕੇਰਲਾ ਦੀ ਪੁਲਸ ਹੋਰਨਾਂ ਮੁੱਦਿਆਂ ਤੋਂ ਧਿਆਨ ਭਟਕਾਉਣ ਦੀ ਕੋਸ਼ਿਸ਼ ਕਰ ਰਹੀ ਹੈ। ਇਸ ਸਮੇਂ ਸਮੁੱਚੇ ਕੇਰਲਾ ਵਿੱਚ ਹੀ ਸੀ.ਪੀ.ਐਮ. ਦੀ ਅਗਵਾਈ ਵਾਲੀ ਖੱਬੇ ਜਮਹੂਰੀ ਮੋਰਚੇ ਦੀ ਹਕੂਮਤ ਵਿਰੁੱਧ ਮਨੁੱਖੀ ਹੱਕਾਂ ਦੇ ਘੋਰ ਉਲੰਘਣ ਦੇ ਖਿਲਾਫ ਉਭਾਰ ਉੱਠਿਆ ਹੋਇਆ ਹੈ। ਮਨੁੱਖੀ ਹੱਕਾਂ ਦੇ ਕਾਰਕੁੰਨਾਂ ਵੱਲੋਂ 29 ਅਕਤੂਬਰ ਨੂੰ ਕੋਜ਼ੀਕੋਡ ਵਿੱਚ ਇੱਕ ਮੁਜਾਹਰਾ ਵੀ ਕੀਤਾ ਗਿਆ ਸੀ ਜਿਥੇ ਪੁਲਸ ਨੇ ਗ੍ਰਿਫਤਾਰੀਆਂ ਕੀਤੀਆਂ ਸਨ। ਇਹਨਾਂ ਮੁਕਾਬਲਿਆਂ ਦੇ ਖਿਲਾਫ ਉੱਠਣ ਵਾਲੀ ਕਿਸੇ ਵੀ ਆਵਾਜ਼ ਨੂੰ ਸੀ.ਪੀ.ਐਮ. ਵੀ ਹਿੰਦੂਤਵੀ ਫਾਸ਼ੀਵਾਦੀਆਂ ਵਾਂਗ ਹੀ ਕੁਚਲ ਰਹੀ ਹੈ। 
ਕੇਰਲਾ ਵਿੱਚ ਇਸ ਝੂਠੇ ਮੁਕਾਬਲੇ ਤੋਂ ਬਾਅਦ ਵਿੱਚ ਖੱਬੇ ਜਮਹੂਰੀ ਮੋਰਚੇ ਦੀ ਪੁਲਸ ਨੇ ਸੀ.ਪੀ.ਆਈ.(ਐਮ.) ਦੇ ਦੋ ਕਾਰਕੁੰਨਾਂ- ਅਲੇਨ ਸੁਹੈਬ ਅਤੇ ਤਾਹਾ ਫਾਸਲ- ਗੈਰ-ਕਾਨੂੰਨੀ ਗਤੀਵਿਧੀਆਂ ਰੋਕੂ ਕਾਨੂੰਨ (ਯੂ.ਏ.ਪੀ.ਏ.) ਤਹਿਤ ਉਹਨਾਂ ਨੂੰ ਮਾਓਵਾਦੀਆਂ ਦੇ ਹਮਾਇਤੀ ਹੋਣ ਦੇ ਦੋਸ਼ ਵਿੱਚ ਗ੍ਰਿਫਤਾਰ ਕੀਤਾ ਹੈ। ਪੁਲਸ ਨੇ ਦਾਅਵਾ ਕੀਤਾ ਹੈ ਕਿ ਇਹਨਾਂ ਕੋਲੋਂ ਮਾਓਵਾਦੀ ਸਾਹਿਤ ਹਾਸਲ ਹੋਇਆ ਹੈ। 
ਸੁਹੈਲ ਵਕਾਲਤ ਦੀ ਪੜ੍ਹਾਈ ਕਰ ਰਿਹਾ ਹੈ ਜਦੋਂ ਕਿ ਫਾਸਲ ਸੀ.ਪੀ.ਐਮ. ਦੀ ਬਰਾਂਚ ਕਮੇਟੀ ਦਾ ਮੈਂਬਰ ਹੈ। ਇਹ ਪਹਿਲੀ ਵਾਰੀ ਹੈ ਜਦੋਂ ਸੀ.ਪੀ.ਐਮ. ਨੇ ਆਪਣੇ ਕਾਡਰਾਂ ਨੂੰ ਹੀ ਕਾਲੇ ਕਾਨੂੰਨਾਂ ਤਹਿਤ ਗ੍ਰਿਫਤਾਰ ਕੀਤਾ ਹੈ। ਕੇਰਲਾ ਵਿੱਚ ਸੀ.ਪੀ.ਐਮ. ਮੁਸਲਮਾਨਾਂ ਦੇ ਖਿਲਾਫ ਹੋ-ਹੱਲਾ ਮਚਾ ਕੇ ਖੱਬੇ ਜਮਹੂਰੀ ਮੋਰਚੇ ਲਈ ਜਾਗੀਰਦਾਰਾਂ ਦੀਆਂ ਉੱਚ-ਜਾਤੀਆਂ ਨੂੰ ਆਪਣੇ ਪੱਖ ਵਿੱਚ ਕਰਨਾ ਚਾਹੁੰਦੀ ਹੈ ਤਾਂ ਕਿ ਉਹਨਾਂ ਨੂੰ ਬੀ.ਜੇ.ਪੀ. ਅਤੇ ਆਰ.ਐਸ.ਐਸ. ਦੇ ਕਲਾਵੇਂ ਤੋਂ ਵੱਖ ਕੀਤਾ ਜਾ ਸਕੇ। ਇਸ ਤਰ੍ਹਾਂ ਉਹ ਉਹਨਾਂ ਕੋਲੋਂ ਆਪਣੀ ਹਕੂਮਤ ਦੀ ਕਾਇਮੀ ਲਈ ਮੁੜ ਤੋਂ ਸਮਰਥਨ ਹਾਸਲ ਕਰਨਾ ਚਾਹੁੰਦੀ ਹੈ। ਕੇਰਲਾ ਦੇ ਪਲੱਕੜ ਮੁਕਾਬਲੇ ਦੀ ਕਹਾਣੀ ਉਹੋ ਜਿਹੀ ਹੀ ਹੈ ਜਿਹੋ ਜਿਹੀਆਂ ਕਹਾਣੀਆਂ ਭਾਜਪਾ ਅਤੇ ਕਾਂਗਰਸ ਪਾਰਟੀ ਦੀ ਅਗਵਾਈ ਵਾਲੀਆਂ ਸਰਕਾਰਾਂ ਰਚਦੀਆਂ ਹਨ। ਜਮਹੂਰੀ ਹੱਕਾਂ ਦੀਆਂ ਜਥੇਬੰਦੀਆਂ ਦੇ ਕਾਰਕੁੰਨਾਂ ਨੇ ਆਖਿਆ ਹੈ ਕਿ ਕਿਸੇ ਕੋਲ ਵੀ ਮਾਓਵਾਦੀ ਸਾਹਿਤ ਦਾ ਹੋਣਾ ਆਪਣੇ ਆਪ ਵਿੱਚ ਕੋਈ ਦੋਸ਼ ਨਹੀਂ ਬਣ ਜਾਂਦਾ ਜਦੋਂ ਕਿ ਸੁਪਰੀਮ ਕੋਰਟ ਨੇ 2011 ਵਿੱਚ ਆਖਿਆ ਸੀ ਕਿ ਕਿਸੇ ਕੋਲ ਮਾਓਵਾਦੀ ਸਾਹਿਤ ਹੋਣ ਨਾਲ ਹੀ ਉਹ ਮਾਓਵਾਦੀ ਨਹੀਂ ਬਣ ਜਾਂਦਾ।