ਅਮਰੀਕਾ ਦਾ ਰਾਸ਼ਟਰਪਤੀ ਟਰੰਪ ਦੋਸ਼ੀ ਕਰਾਰ

ਸਭ ਤੋਂ ਵੱਧ ਪੁਰਾਣੀ ਜਮਹੂਰੀਅਤ ਅਖਵਾਉਣ ਵਾਲੇ ਦੇਸ਼ 
ਅਮਰੀਕਾ ਦਾ ਰਾਸ਼ਟਰਪਤੀ ਟਰੰਪ ਦੋਸ਼ੀ ਕਰਾਰ
18 ਦਸੰਬਰ 2019 ਨੂੰ ਅਮਰੀਕੀ ਰਾਸ਼ਟਰਪਤੀ ਟਰੰਪ ਨੂੰ ਸਦਨ ਵਿੱਚ ਮਹਾਂਦੋਸ਼ ਦਾ ਸਾਹਮਣਾ ਕਰਨਾ ਪਿਆ। ਉਸ ਉੱਪਰ ''ਤਾਕਤ ਦੀ ਦੁਰਵਰਤੋਂ ਕਰਨ'' ਅਤੇ ''ਸਦਨ ਦੀ ਕਾਰਵਾਈ ਵਿੱਚ ਵਿਘਨ ਪਾਉਣ'' ਦਾ ਮਹਾਂਦੋਸ਼ ਲੱਗਿਆ ਹੈ। 435 ਮੈਂਬਰ ਸਦਨ ਵਿੱਚ ਟਰੰਪ 'ਤੇ ''ਤਾਕਤ ਦੀ ਦੁਰਵਰਤੋਂ ਕਰਨ'' ਦਾ ਮੱਤ 197 ਵੋਟਾਂ ਦੇ ਮੁਕਾਬਲੇ 230 ਨਾਲ ਪਾਸ ਹੋਇਆ ਅਤੇ ''ਸਦਨ ਦੀ ਕਾਰਵਾਈ ਵਿੱਚ ਵਿਘਨ ਪਾਉਣ'' ਦੇ ਮਾਮਲੇ ਵਿੱਚ 198 ਦੇ ਮੁਕਾਬਲੇ 229 ਵੋਟਾਂ ਨਾਲ ਪਾਸ ਹੋ ਗਿਆ। 
ਰਾਸ਼ਟਰਪਤੀ ਟਰੰਪ ਦੇ ਖਿਲਾਫ ਮਹਾਂਦੋਸ਼ ਲੱਗਣ ਦਾ ਮੁੱਢ ਤਾਂ ਉਸ ਦੀ ਚੋਣ ਮੁਹਿੰਮ ਦੌਰਾਨ ਹੀ ਬੰਨ੍ਹਿਆ ਗਿਆ ਸੀ, ਜਦੋਂ ਉਸ ਨੇ ਰਾਸ਼ਟਰਪਤੀ ਦੀ ਚੋਣ ਵਿੱਚ ਆਪਣੀ ਵਿਰੋਧੀ ਹਿਲੇਰੀ ਕਲਿੰਟਨ ਦੇ ਵਿਰੁੱਧ ਪ੍ਰਚਾਰ ਵਿੱਚ ਰੂਸੀ ਹਕੂਮਤ ਨਾਲ ਗੰਢ-ਤਰੁੱਪ ਕਰ ਲਈ ਸੀ। ਟਰੰਪ ਨੇ ਰੂਸੀ ਹਕੂਮਤ ਕੋਲੋਂ ਹਿਲੇਰੀ ਦੇ ਨਿੱਜੀ ਜੀਵਨ ਸਬੰਧੀ ਅਤੇ ਡੈਮੋਕਰੇਟਿਕ ਪਾਰਟੀ ਦੇ ਖਿਲਾਫ ਸਿਆਸੀ ਪ੍ਰਚਾਰ ਕਰਵਾਇਆ ਸੀ। ਅਮਰੀਕਾ ਦਾ ਖੁਫੀਆ ਏਜੰਸੀ ਨੇ ਰੂਸੀ ਹਕੂਮਤ ਨਾਲ ਗੰਢ-ਤੁੱਪ ਦੀ ਪੁਸ਼ਟੀ ਕੀਤੀ ਹੈ। ਟਰੰਪ ਦੇ ਜੋਟੀਦਾਰ ਇਸ ਕਾਰਵਾਈ ਵਿੱਚ ਫਸ ਗਏ ਪਰ ਉਹ ਐਫ.ਬੀ.ਆਈ. ਖੁਫੀਆ ਏਜੰਸੀ ਕੋਲ ਪੇਸ਼ ਨਹੀਂ ਸੀ ਹੋਇਆ। ਉਹ ਇਸ ਕਾਰਵਾਈ ਨੂੰ ਆਪਣੇ ਖਿਲਾਫ ''ਸਾਜਿਸ਼'' ਕਰਾਰ ਦਿੰਦਾ ਰਿਹਾ।
ਰਾਸ਼ਟਰਪਤੀ ਦੀ 2020 ਵਾਲੀ ਚੋਣ ਵਿੱਚ ਟਰੰਪ ਦਾ ਸੰਭਾਵੀ ਵਿਰੋਧੀ ਡੈਮੋਕਰੇਟ ਪਾਰਟੀ ਦਾ ਸੰਭਾਵੀ ਵਿਰੋਧੀ ਜੋਇ ਬਿਦੇਨ ਹੋ ਸਕਦਾ ਹੈ। ਜਦੋਂ ਉਹ ਬਾਰਾਕ ਓਬਾਮਾ ਦੇ ਕਾਰਜਕਾਲ ਵਿੱਚ ਉੱਪ-ਰਾਸ਼ਟਰਪਤੀ ਸੀ ਤਾਂ ਉਸਦੇ ਪੁੱਤਰ ਹੰਟਰ ਬਿਦੇਨ ਨੇ ਯੂਕਰੇਨ ਦੀ ਊਰਜਾ ਕੰਪਨੀ ਨਾਲ ਕੁੱਝ ਲੈਣ-ਦੇਣ ਕੀਤਾ ਸੀ। ਟਰੰਪ ਨੂੰ ਇਹ ਲੱਗਦਾ ਸੀ ਕਿ ਇੱਥੇ ਕੁੱਝ ਨਾ ਕੁੱਝ ਗੜਬੜ-ਘੁਟਾਲਾ ਹੋ ਸਕਦਾ ਹੈ। ਇਸ ਸਬੰਧੀ ਟਰੰਪ ਨੇ ਯੂਕਰੇਨ ਦੇ ਰਾਸ਼ਟਰਪਤੀ ਨਾਲ 25 ਜੁਲਾਈ ਨੂੰ ਫੋਨ 'ਤੇ ਗੱਲਬਾਤ ਕੀਤੀ ਸੀ। ਉਸ ਨੇ ਯੂਕਰੇਨੀ ਰਾਸ਼ਟਰਪਤੀ ਨੂੰ ਆਖਿਆ ਸੀ ਕਿ ਜੇਕਰ ਉਸਨੇ ਬਿਦੇਨ ਦੇ ਮਾਮਲੇ ਵਿੱਚ ਕੋਈ ਕਾਰਵਾਈ ਨਾ ਕੀਤੀ ਤਾਂ ਉਹ ਯੂਕਰੇਨ ਨੂੰ ਦਿੱਤੀ ਜਾਣ ਵਾਲੀ 40 ਕਰੋੜ ਡਾਲਰ ਦੀ ਫੌਜੀ ਸਹਾਇਤਾ ਰੋਕ ਦੇਵੇਗਾ। ਟਰੰਪ ਨੇ ਜੋ ਕੁੱਝ ਵੀ ਕੀਤਾ ਇਸ ਦਾ ਅਮਰੀਕਾ ਨੂੰ ਕੋਈ ਲਾਹਾ ਨਹੀਂ ਸੀ ਹੋਣਾ ਬਲਕਿ ਉਸ ਨੂੰ ਖੁਦ ਨੂੰ ਲਾਹਾ ਹੋਣਾ ਸੀ, ਜਿਸ ਨਾਲ  ਉਹ ਆਪਣੇ ਸਿਆਸੀ ਵਿਰੋਧੀਆਂ ਨੂੰ ਨੁੱਕਰੇ ਲਾ ਸਕਦਾ ਸੀ। ਇਹ ਚਰਚਾ ਜੱਗ ਜ਼ਾਹਰ ਹੋਣ 'ਤੇ ਟਰੰਪ ਇਸ ਤਰ੍ਹਾਂ ਦੀ ਵਾਰਤਾਲਾਪ ਤੋਂ ਮੁੱਕਰ ਗਿਆ। ਅਮਰੀਕੀ ਲੋਕਾਂ ਨਾਲ ਇਹ ਧੋਖਾ ਕਰਨ 'ਤੇ ਉਸ ਦੇ ਖਿਲਾਫ ਮਹਾਂਦੋਸ਼ ਲਾਉਣ ਦਾ ਪੈੜਾ ਬੰਨ੍ਹਿਆ ਗਿਆ। ਟਰੰਪ ਨੇ ਆਪਣੀ ਸਫਾਈ ਦੇਣ ਲਈ ਉਸ ਵਾਰਤਾਲਾਪ ਦਾ ਕੁੱਝ ਹਿੱਸਾ ਨਸ਼ਰ ਕੀਤਾ ਜਿਸ ਵਿੱਚ ਫੌਜੀ ਸਹਾਇਤਾ ਰੋਕੇ ਜਾਣ ਵਾਲੇ ਪੱਖ ਨੂੰ ਲੁਕੋਇਆ ਗਿਆ ਸੀ। ਉਸ ਨੇ 24 ਸਤੰਬਰ ਨੂੰ ਜਾਰੀ ਫੋਨ ਵਾਰਤਾ ਵਿੱਚ ਆਖਿਆ ਸੀ, ''ਬਿਦੇਨ ਦੇ ਪੁੱਤਰ ਬਾਰੇ ਬਹੁਤ ਸਾਰੀਆਂ ਗੱਲਾਂ ਚੱਲ ਰਹੀਆਂ ਹਨ, ਬਿਦੇਨ ਨੇ ਪੈਰਵਾਈ ਕਰਨੀ ਛੱਡ ਦਿੱਤੀ ਹੈ, ਬਹੁਤ ਸਾਰੇ ਲੋਕ ਇਸ ਬਾਰੇ ਜਾਨਣਾ ਚਾਹੁੰਦੇ ਹਨ, ਇਸ ਕਰਕੇ ਇਸ ਬਾਰੇ ਤੁਸੀਂ ਅਟਾਰਨੀ ਜਨਰਲ ਨਾਲ ਜੋ ਵੀ ਗੱਲ ਕਰ ਸਕਦੇ ਹੋ ਕਰੋ, ਇਹ ਬਹੁਤ ਵੱਡਾ ਕੰਮ ਹੋਵੇਗਾ। ਬਿਦੇਨ ਦਾਅਵੇ ਕਰ ਰਿਹਾ ਹੈ ਕਿ ਉਸਨੇ ਪੈਰਵਾਈ ਕਰਨੀ ਬੰਦ ਕਰ ਦਿੱਤੀ ਹੈ, ਇਸ ਕਰਕੇ ਤੁਸੀਂ ਇਸ ਸਬੰਧੀ ਜੋ ਕਰ ਸਕਦੇ ਹੋ ਕਰੋ। ਇਹ ਕੁੱਝ ਮੈਨੂੰ ਬਹੁਤ ਬੁਰਾ ਲੱਗਦਾ ਹੈ।''
ਡੈਮੋਕਰੇਟਿਕ ਪਾਰਟੀ ਵੱਲੋਂ ਟਰੰਪ ਦੇ ਖਿਲਾਫ ਮਹਾਂਦੋਸ਼ ਲਾਉਣ ਦਾ ਮਨੋਰਥ ਇਹ ਨਹੀਂ ਸੀ ਕਿ ਇਸ ਨੂੰ ਫੌਰੀ ਤੌਰ 'ਤੇ ਸੱਤਾ ਤੋਂ ਲਾਂਭੇ ਕੀਤਾ ਜਾ ਸਕਦਾ ਹੈ। ਉਸ ਨੂੰ ਇਹ ਲੱਗਦਾ ਸੀ ਕਿ ਇਸ ਨਾਲ ਰਿਪਬਲਿਕਨ ਪਾਰਟੀ ਦੀ ਆਮ ਕਰਕੇ ਅਤੇ ਟਰੰਪ ਦੀ ਖਾਸ ਕਰਕੇ ਬਦਨਾਮੀ ਹੋਵੇਗੀ ਅਤੇ ਉਹ ਅਗਲੀ ਚੋਣ ਵਿੱਚ ਰਾਸ਼ਟਰਪਤੀ ਦੀ ਚੋਣ ਵਿੱਚ ਉਮੀਦਵਾਰ ਨਹੀਂ ਰਹੇਗਾ। ਪਰ 100 ਮੈਂਬਰੀ ਉੱਪਰਲੇ ਸਦਨ (ਸੈਨੇਟ) ਵਿੱਚ ਰਿਪਬਲਿਕਨ ਪਾਰਟੀ ਕੋਲ 53 ਮੈਂਬਰ ਹਨ, ਜਦੋਂ ਕਿ ਡੈਮੋਕਰੇਟਿਕ ਪਾਰਟੀ ਕੋਲ ਸਿਰਫ 47 ਮੈਂਬਰ ਹੀ ਹਨ, ਜਦੋਂ ਕਿ ਮਹਾਂਦੋਸ਼ ਸਾਬਤ ਕਰਨ ਲਈ ਦੋ-ਤਿਹਾਈ ਬਹੁਮੱਤ ਹੋਣਾ ਜ਼ਰੂਰੀ ਹੈ, ਇਸ ਤਰ੍ਹਾਂ ਡੈਮੋਕਰੇਟਿਕ ਪਾਰਟੀ ਰਿਪਬਲਿਕਨ ਪਾਰਟੀ ਦੇ 20 ਮੈਂਬਰਾਂ ਨੂੰ ਤਾਂ ਆਪਣੇ ਨਾਲ ਨਹੀਂ ਜੋੜ ਸਕਦੀ ਤਾਂ ਕਰਕੇ ਉੱਪਰਲੇ ਸਦਨ ਵਿੱਚ ਟਰੰਪ ਨੂੰ ਕੋਈ ਆਂਚ ਨਹੀਂ ਆਉਣੀ ਤੇ ਉਹ ਅਮਰੀਕਾ ਦੇ ਰਾਸ਼ਟਰਪਤੀ ਵਜੋਂ ਬਣਿਆ ਰਹੇਗਾ। ਟਰੰਪ ਨੇ ਬੇਸ਼ਰਮੀ ਅਤੇ ਢੀਠਤਾਈ ਅਖਤਿਆਰ ਕਰਦੇ ਹੋਏ ਆਪਣੀ ਬਦਨਾਮੀ ਨੂੰ ਬਦਨਾਮੀ ਨਾ ਮੰਨ ਕੇ ਆਪਣੇ ਵਿਰੋਧੀ ਡੈਮੋਕਰੇਟਾਂ ਅਤੇ ਸਦਨ ਦੀ ਸਪੀਕਰ ਸ੍ਰੀਮਤੀ ਪੇਲੋਸੀ ਨੂੰ ਆਖਿਆ ਹੈ ਕਿ ਉਹਨਾਂ ਨੂੰ 2020 ਦੀਆਂ ਚੋਣਾਂ ਵਿੱਚ ਖਮਿਆਜਾ ਭੁਗਤਣਾ ਪਵੇਗਾ।
ਸਭ ਤੋਂ ਵੱਧ ਪੁਰਾਣੀ ਜਮਹੂਰੀਅਤ  ਅਖਵਾਉਣ ਵਾਲੇ ਅਮਰੀਕਾ ਵਿੱਚ ਹੁਣ ਤੱਕ ਕੁੱਲ 45 ਰਾਸ਼ਟਰਪਤੀ ਹੋਏ ਹਨ, ਜਿਹਨਾਂ ਵਿੱਚੋਂ ਟਰੰਪ ਸਮੇਤ ਚਾਰਾਂ ਉੱਪਰ ਮਹਾਂਦੋਸ਼ ਲੱਗੇ ਹਨ। ਸਭ ਤੋਂ ਪਹਿਲਾਂ ਮਹਾਂਦੋਸ਼ 1868 ਵਿੱਚ ਐਂਡਰਿਊ ਜੌਹਨਸਨ ਵਿੱਚ ਦੇਸ਼ ਦੀ ਖਾਨਾਜੰਗੀ ਸਬੰਧੀ ਲੱਗਿਆ ਸੀ। ਦੂਸਰਾ ਮਹਾਂਦੋਸ਼ 1974 ਵਿੱਚ ਨਿਕਸਨ ਦੇ ਖਿਲਾਫ ਲੱਗਿਆ ਸੀ। ਤੀਸਰਾ ਮਹਾਂਦੋਸ਼ ਬਿਲ ਕਲਿੰਟਨ ਦੇ ਖਿਲਾਫ 1999 ਵਿੱਚ ਮੋਨੀਕਾ ਲਵੰਸਕੀ ਕਾਂਡ ਦਾ ਲੱਗਿਆ ਸੀ। ਪਹਿਲੇ ਅਤੇ ਤੀਜੇ ਮਹਾਂਦੋਸ਼ਾਂ ਵਿੱਚ ਸਬੰਧਤ ਰਾਸ਼ਟਰਪਤੀ ਉੱਪਰਲੇ ਸਦਨ ਵਿੱਚ ਇਹਨਾਂ ਪੱਖੀ ਬਹੁਮੱਤ ਹੋਣ ਕਰਕੇ ਰਾਸ਼ਟਰਪਤੀ ਦੇ ਅਹੁਦੇ 'ਤੇ ਕਾਇਮ ਰਹੇ ਜਦੋਂ ਕਿ ਨਿਕਸਨ ਨੇ ਖੁਦ ਹੀ ਅਸਤੀਫਾ ਦੇ ਦਿੱਤਾ ਸੀ ਇਸ ਕਰਕੇ ਵੋਟਿੰਗ ਦੀ ਨੌਬਤ ਨਹੀਂ ਸੀ ਆਈ।
ਟਰੰਪ 'ਤੇ ਇਹ ਦੋਸ਼ ਲੱਗਿਆ ਹੈ ਕਿ ਉਸ ਨੇ ''ਅਦਾਲਤੀ ਮਰਿਆਦਾ ਦਾ ਸਿੱਧਾ, ਸਪੱਸ਼ਟ, ਬੇਮਿਸਾਲ ਘੋਰ ਉਲੰਘਣ ਕੀਤਾ ਹੈ।'' ਜੋ ਕੁੱਝ ਟਰੰਪ 'ਤੇ ਦੋਸ਼ ਲੱਗਿਆ ਹੈ, ਇਹ ਕੁੱਝ ਅਜਿਹੇ ਹੰਕਾਰੇ ਮਨੁੱਖ ਕੋਲੋਂ ਸੰਭਵ ਹੀ ਹੈ, ਜਿਹੜਾ ਜੁਲਾਈ 2018 ਨੂੰ ਆਪਣੇ ਇੱਕ ਟਵੀਟ ਵਿੱਚ ਲਿਖਦਾ ਹੈ ''ਮੈਂ ਇਤਿਹਾਸ ਵਿੱਚ ਸਭ ਤੋਂ ਵੱਧ ਹਰਮਨਪਿਆਰਾ ਵਿਅਕਤੀ ਹਾਂ। ਮੈਂ ਲਿੰਕਨ ਤੋਂ ਅੱਗੇ ਨਿਕਲ ਗਿਆ ਹਾਂ। ਮੈਂ ਸਾਡੇ ਅਬੇ ਤੋਂ ਵੀ ਅੱਗੇ ਹਾਂ।'' ਉਸ ਨੂੰ ਘੁਮੰਡ ਹੈ ਕਿ ਉਸਨੇ ''ਰਿਪਬਲਿਕਨਾਂ ਵਿੱਚ 94 ਫੀਸਦੀ ਵੋਟਾਂ ਹਾਸਲ ਕਰਕੇ ਇੱਕ ਰਿਕਾਰਡ ਕਾਇਮ ਕੀਤਾ ਹੈ।''
ਟਰੰਪ ਨੇ ਝੂਠ ਬੋਲਣ ਅਤੇ ਮਸਲਿਆਂ ਨੂੰ ਤਿਲ੍ਹਕਾਉਣ ਵਿੱਚ ਇੱਕ ਤਰ੍ਹਾਂ ਦਾ ਠੇਕਾ ਹੀ ਲਿਆ ਹੋਇਆ ਹੈ। ਉਹ ਅਮਰੀਕੀ ਲੋਕਾਂ ਵਿੱਚ ਬੇਰੁਜ਼ਗਾਰੀ ਦੀ ਅਸਲ ਵਜਾਹ ਨੂੰ ਦੱਸਣ ਦੀ ਥਾਂ ਮੈਕਸੀਕੋ ਤੋਂ ਆ ਰਹੇ ਪਰਵਾਸੀਆਂ ਨੂੰ ਦੋਸ਼ੀ ਠਹਿਰਾਅ ਰਿਹਾ ਹੈ। ਉਹ ਆਖਦਾ ਹੈ ਕਿ ''ਮੈਂ ਅਮਰੀਕਾ ਨੂੰ ਫੇਰ ਤੋਂ ਮਹਾਨ ਬਣਾਉਣ ਵਾਸਤੇ ਚੁਣਿਆ ਗਿਆ ਹਾਂ। ਮੈਂ ਤੁਹਾਨੂੰ ਸਾਰਿਆਂ ਨੂੰ ਰੁਜ਼ਗਾਰ ਦੇਵਾਂਗਾ। ਡੈਮੋਕਰੇਟਿਕ ਪਾਰਟੀ ਨੇ ਮਹਾਂਦੋਸ਼ ਅਤੇ ਮੁਕੱਦਮੇ ਨਾਲ ਮੈਨੂੰ ਉਲਝਾਇਆ ਹੋਇਆ ਹੈ। ਜੇਕਰ ਮੈਨੂੰ ਉਲਝਾਇਆ ਹੋਇਆ ਨਾ ਹੁੰਦਾ ਤਾਂ ਮੈਂ ਅਮਰੀਕਾ-ਮੈਕਸੀਕੋ ਦੇ ਬਾਰਡਰ 'ਤੇ ਕੰਧ ਬਣਵਾ ਦੇਣੀ ਸੀ, ਜਿਹੜੀ ਸਾਡੇ ਦੇਸ਼ ਵਿੱਚ ਪ੍ਰਵਾਸੀਆਂ ਦਾ ਦਾਖਲਾ ਰੋਕਦੀ। ਇਹ ਪ੍ਰਵਾਸੀ ਤੁਹਾਡੀਆਂ ਨੌਕਰੀਆਂ ਖੋਹ ਰਹੇ ਹਨ, ਤਾਂ ਕਰਕੇ ਹੀ ਤੁਹਾਨੂੰ ਰੁਜ਼ਗਾਰ ਨਹੀਂ ਮਿਲ ਰਿਹਾ। ਅਮਰੀਕਾ ਨੂੰ ਮਹਾਨ ਮੈਂ ਇਸ ਕਰਕੇ ਨਹੀਂ ਬਣਾ ਸਕਿਆ ਡੈਮੋਕਰੇਟ ਅਤੇ ਉਹਨਾਂ ਦਾ ਮਹਾਂਦੋਸ਼ ਮੇਰੇ ਰਾਹ ਦਾ ਰੋੜਾ ਬਣਿਆ ਹੋਇਆ ਹੈ।'' ਜਦੋਂ ਕਿ ਸਚਾਈ ਇਹ ਹੈ ਕਿ ਅਮਰੀਕਾ ਵਿੱਚ ਸਨਅਤੀ ਉਤਪਾਦਨ ਦਾ ਰੁਜ਼ਗਾਰ ਵਿੱਚ ਹਿੱਸਾ 1960 ਵਿੱਚ 28 ਫੀਸਦੀ ਸੀ, ਜਿਹੜਾ 2017 ਵਿੱਚ ਘਟ ਕੇ ਸਿਰਫ 8 ਫੀਸਦੀ ਰਹਿ ਗਿਆ ਹੈ। ਇਸੇ ਹੀ ਤਰ੍ਹਾਂ ਅਮਰੀਕਾ ਨੇ ਅਫਗਾਨਿਸਤਾਨ, ਇਰਾਕ ਅਤੇ ਸੀਰੀਆ ਆਦਿ 'ਤੇ ਹਮਲੇ ਕਰਕੇ ਤੇਲ ਭੰਡਾਰਾਂ 'ਤੇ ਕਬਜ਼ਿਆਂ ਰਾਹੀਂ ਜੋ ਕੁੱਝ ਹਾਸਲ ਕਰਨ ਦਾ ਭਰਮ ਪਾਲਿਆ ਸੀ, ਉਹ ਪੂਰਾ ਨਹੀਂ ਹੋ ਸਕਿਆ। ਅਰਬਾਂ-ਖਰਬਾਂ ਡਾਲਰ ਝੋਕ ਕੇ ਇਸ ਦੇ ਪੱਲੇ ਆਰਥਿਕ ਮੰਦਵਾੜਾ ਹੀ ਪਿਆ ਹੈ। ਪਰ ਟਰੰਪ ਲਈ ਅਜਿਹੇ ਮੁੱਦੇ ਚਰਚਾ ਦਾ ਵਿਸ਼ਾ ਨਹੀਂ ਹਨ। ਉਹ ਲੋਕਾਂ ਦੀਆਂ ਅਸਲ ਸਮੱਸਿਆਵਾਂ ਵੱਲ ਧਿਆਨ ਦੇਣ-ਦਿਵਾਉਣ ਦੀ ਥਾਂ ਹੋਰ ਹੋਰ ਸ਼ੁਰਲੀਆਂ ਛੱਡ ਕੇ ਧੂੜ ਵਿੱਚ ਟੱਟੂ ਛੱਡਣ ਲੱਗਿਆ ਹੋਇਆ ਹੈ। 
ਟਰੰਪ ਵੱਲੋਂ ਲੋਕਾਂ ਨੂੰ ਮੂਰਖ ਬਣਾਉਣ ਲਈ, ਝੂਠ ਬੋਲ ਕੇ ਜੋ ਕੁੱਝ ਕੀਤਾ ਜਾ ਰਿਹਾ ਹੈ, ਇਸ ਨੇ ਸਾਬਤ ਕਰ ਦਿੱਤਾ ਹੈ ਕਿ ਅਮਰੀਕੀ ਹਾਕਮ ਜਿਹੜੀ ਜਮਹੂਰੀਅਤ ਦੀ ਕਾਵਾਂਰੌਲੀ ਪਾ ਰਹੇ ਹਨ, ਉਹ ਅਸਲ ਵਿੱਚ ਜਮਹੂਰੀਅਤ ਨਹੀਂ ਹੈ ਸਗੋਂ ਲੁਟੇਰੇ ਟੋਲਿਆਂ ਦੀ ਤਾਨਾਸ਼ਾਹੀ ਹੈ, ਜਿਹੜੇ ਆਪਣੇ ਮੁਫਾਦਾਂ ਦੀ ਖਾਤਰ ਦੇਸ਼ ਦੇ ਆਮ ਲੋਕਾਂ ਨੂੰ ਤੇ ਅਮਰੀਕੀ ਸਦਨ ਨੂੰ ਠੁੱਠ ਵਿਖਾ ਸਕਦੇ ਹਨ। ਟਰੰਪ ਵਰਗੇ ਮਕਾਰ ਵਿਅਕਤੀ ਵੱਲੋਂ ਮਸ਼ਹੂਰੀ ਖੱਟਣ ਵਿੱਚ ਅਮਰੀਕਾ ਦੇ ਪ੍ਰਚਾਰ-ਪ੍ਰਸਾਰ ਮਾਧਿਅਮਾਂ ਦਾ ਬਹੁਤ ਵੱਡਾ ਰੋਲ ਹੈ ਜਿਹੜੇ ਸੱਚ ਨੂੰ ਝੂਠ ਅਤੇ ਝੂਠ ਨੂੰ ਸੱਚ ਬਣਾ ਕੇ ਪੇਸ਼ ਕਰਦੇ ਹੋਏ ਲੋਕਾਂ ਨੂੰ ਵਿਆਪਕ ਪੱਧਰ 'ਤੇ ਗੁੰਮਰਾਹ ਕਰਨ ਵਿੱਚ ਸਮਰੱਥ ਹੋ ਨਿੱਬੜਦੇ ਹਨ।