ਫਰੀਦਕੋਟ 'ਚ ਰਾਜਿੰਦਰ ਸਿੰਘ 'ਤੇ ਕਾਤਲਾਨਾ ਹਮਲਾ

ਫਰੀਦਕੋਟ 'ਚ ਰਾਜਿੰਦਰ ਸਿੰਘ 'ਤੇ ਕਾਤਲਾਨਾ ਹਮਲਾ
ਸਿਆਸੀ-ਗੁੰਡਾ ਗੱਠਜੋੜ ਭੰਨਣ ਲਈ ਲੋਕ-ਤਾਕਤ ਦੀ ਉਸਾਰੀ ਕਰੋ
ਬੀਤੀ 29 ਦਸੰਬਰ ਨੂੰ ਕਿਰਤੀ ਕਿਸਾਨ ਯੂਨੀਅਨ ਪੰਜਾਬ ਦੇ ਸੂਬਾ ਮੀਤ ਪ੍ਰਧਾਨ ਰਜਿੰਦਰ ਸਿੰਘ ਤੇ ਫਰੀਦਕੋਟ ਜੇਲ੍ਹ ਵਿੱਚ ਜਾਨਲੇਵਾ ਹਮਲਾ ਕੀਤਾ ਗਿਆ। ਇਹ ਹਮਲਾ ਕੋਈ ਵਿਅਕਤੀਗਤ ਹਮਲਾ ਨਹੀਂ ਮੰਨਿਆ ਜਾ ਸਕਦਾ। ਇਹ ਹਮਲਾ ਪੰਜਾਬ ਦੀ ਇਨਕਲਾਬੀ ਲਹਿਰ 'ਤੇ ਪੰਜਾਬ ਸਰਕਾਰ ਦੇ ਸਿਆਸੀ-ਗੁੰਡਾ ਗੱਠਜੋੜ ਵਲੋਂ ਕੀਤਾ ਗਿਆ ਹੈ। ਜ਼ਿਕਰਯੋਗ ਹੈ ਕਿ ਫਰੀਦਕੋਟ ਪ੍ਰਸ਼ਾਸਨ ਲਈ ਰਜਿੰਦਰ ਸਿੰਘ ਦੀ ਅਗਵਾਈ ਵਿੱਚ ਲੜਿਆ ਜਾ ਰਿਹਾ 'ਜਿਣਸੀ ਜ਼ਬਰ ਵਿਰੋਧੀ ਘੋਲ' ਪ੍ਰਸ਼ਾਸਨ ਲਈ ਗਲੇ ਦੀ ਹੱਡੀ ਬਣ ਚੁੱਕਾ ਹੈ। ਫਰੀਦਕੋਟ ਮੈਡੀਕਲ ਹਸਪਤਾਲ ਵਿੱਚ ਡਾਕਟਰੀ ਦੀ ਪੜ੍ਹਾਈ ਕਰ ਰਹੀ ਲੜਕੀ ਨਾਲ ਉਸ ਦੇ ਮਾਤਹਿੱਤ ਡਾਕਟਰ ਵਲੋਂ ਸਿਰਫ਼ ਜਿਣਸੀ ਛੇੜਛਾੜ ਹੀ ਨਹੀਂ ਕੀਤੀ ਗਈ, ਉਸ ਦੇ ਭਵਿੱਖ ਨੂੰ ਤਬਾਹ ਕਰਨ ਲਈ ਕੁਚੱਜੀਆਂ ਚਾਲਾਂ ਵੀ ਚੱਲੀਆਂ ਗਈਆਂ। ਉਸ ਨੂੰ ਇੰਟਰਵਿਊ ਵਿੱਚ ਜਾਣਬੁੱਝ ਕੇ ਅਜਿਹੇ ਸਵਾਲ ਉਸੇ ਦੋਸ਼ੀ ਡਾਕਟਰ ਵਲੋਂ ਪੁੱਛੇ ਗਏ ਜਿਹਨਾਂ ਦਾ ਸਬੰਧ ਕਾਮੁਕਤਾ ਨਾਲ ਜਾ ਜੁੜਦਾ ਹੈ ਅਤੇ ਉਸ ਨੂੰ ਹਰ ਕਦਮ 'ਤੇ ਜ਼ਲੀਲ ਕੀਤਾ ਜਾਣ ਲੱਗ ਪਿਆ, ਜਿਸ ਕਾਰਣ ਉਸ ਨੂੰ ਆਪਣੀ ਸ਼ਿਕਾਇਤ ਲੈ ਕੇ ਸੀਨੀਅਰ ਅਧਿਕਾਰੀਆਂ ਕੋਲ ਜਾਣਾ ਪਿਆ, ਜਿੱਥੇ ਕਿ ਉਸ ਦੀ ਸੁਣਵਾਈ ਕਰਨ ਦੀ ਥਾਂ ਉਸ ਨੂੰ ਹੋਰ ਜ਼ਲੀਲ ਕੀਤਾ ਗਿਆ। ਅੰਤ ਪੀੜਿਤ ਮਹਿਲਾ ਡਾਕਟਰ ਵਲੋਂ ਆਪਣੀ ਆਵਾਜ਼ ਪ੍ਰਸ਼ਾਸਨ ਦੇ ਬੋਲ਼ੇ ਕੰਨਾਂ ਤੱਕ ਪਹੁੰਚਾਉਣ ਲਈ ਅੰਦੋਲਨ ਦਾ ਸਹਾਰਾ ਲੈਣਾ ਪਿਆ, ਜਿਸ ਦੀ ਅਗਵਾਈ ਕਿਰਤੀ ਕਿਸਾਨ ਯੂਨੀਅਨ ਦਾ ਸੂਬਾ ਮੀਤ ਪ੍ਰਧਾਨ ਰਾਜਿੰਦਰ ਸਿੰਘ ਕਰ ਰਿਹਾ ਸੀ।
ਰਜਿੰਦਰ ਸਿੰਘ ਦੀ ਅਗਵਾਈ ਵਿੱਚ ਪਹਿਲਾਂ ਵੀ ਫਰੀਦਕੋਟ ਪ੍ਰਸ਼ਾਸਨ ਖ਼ਿਲਾਫ਼ 'ਜਿਣਸੀ ਜ਼ਬਰ ਵਿਰੋਧੀ ਐਕਸ਼ਨ ਕਮੇਟੀ' ਵਲੋਂ ਜ਼ਬਰਦਸਤ ਘੋਲ ਲੜੇ ਗਏ, ਜਿਸ ਤੋਂ ਘਬਰਾ ਕੇ ਫਰੀਦਕੋਟ ਪ੍ਰਸ਼ਾਸਨ ਨੇ ਰਜਿੰਦਰ ਸਿੰਘ ਨੂੰ ਝੂਠੇ ਮੁਕੱਦਮੇ ਵਿੱਚ ਫੜ ਕੇ ਜੇਲ੍ਹ ਵਿੱਚ ਬੰਦ ਕਰ ਦਿੱਤਾ ਗਿਆ।  ਜਿੱਥੇ ਉਸ ਉੱਤੇ ਜਾਨਲੇਵਾ ਹਮਲਾ ਕਰਵਾਇਆ ਗਿਆ ਹੈ।
ਪਹਿਲਾਂ ਰਾਜਿੰਦਰ ਸਿੰਘ ਨੂੰ ਝੂਠੇ ਕੇਸਾਂ ਵਿੱਚ ਫਸਾਉਣਾ ਅਤੇ ਫੇਰ ਜੇਲ੍ਹ ਵਿੱਚ ਉਸ ਉੱਪਰ ਘਾਤਕ ਹਮਲਾ ਹੋਣਾ ਇਹ ਸਾਬਤ ਕਰਦਾ ਹੈ ਕਿ ਫਰੀਦਕੋਟ ਦੀ ਸਿਆਸੀ-ਆਰਥਿਕ ਹੈਸੀਅਤ ਵਿੱਚ ਭਾਰੂ ਅਨਸਰਾਂ ਨੂੰ ਇਹ ਗੱਲ ਉੱਕਾ ਹੀ ਪ੍ਰਵਾਨ ਨਹੀਂ ਕਿ ਕੋਈ ਨੌਜਵਾਨ ਉੱਠ ਕੇ ਉਹਨਾਂ ਨੂੰ ਕੋਈ ਚੁਣੌਤੀ ਦੇ ਜਾਵੇ ਅਤੇ ਉਹ ਇਸਦੀਆਂ ਦਲੀਲਾਂ ਅੱਗੇ ਲਾਜੁਆਬ ਹੋ ਕੇ ਰਹਿ ਜਾਣ। ਰਾਜਿੰਦਰ ਸਿੰਘ ਕੋਈ ਇਕੱਲਾ-ਇਕਹਿਰਾ ਵਿਅਕਤੀ ਨਹੀਂ ਹੈ ਬਲਕਿ ਉਹ ਕਿਸੇ ਜਥੇਬੰਦੀ ਦਾ ਨੁਮਾਇੰਦਾ ਹੈ, ਇਹ ਹਮਲਾ ਕਿਸੇ ਵਿਅਕਤੀ 'ਤੇ ਨਹੀਂ ਬਲਕਿ ਉਸ ਦੀ ਅਗਵਾਈ ਵਾਲੀ ਜਥੇਬੰਦੀ 'ਤੇ ਹਮਲਾ ਹੈ। ਇਸ ਕਰਕੇ ਇਸ ਮਾਮਲੇ ਨੂੰ ਨਿੱਖੜਵੇਂ ਤੇ ਇਕੱਲੇ-ਇਕਹਿਰੇ ਰੂਪ ਵਿੱਚ ਨਹੀਂ ਦੇਖਣਾ ਚਾਹੀਦਾ। ਕੁੱਲ ਮਾਮਲੇ ਵਿੱਚ ਰਾਜਿੰਦਰ ਸਿੰਘ ਦਾ ਕੋਈ ਨਿੱਜੀ ਹਿੱਤ ਵੀ ਨਹੀਂ ਹੈ। ਇਸ ਉੱਪਰ ਹਮਲਾ ਨਿਸ਼ਾਨ ਸਿੰਘ ਦੇ ਗਰੋਹ ਵੱਲੋਂ ਹੀ ਕਰਵਾਇਆ ਗਿਆ ਹਮਲਾ ਨਹੀਂ ਬਲਕਿ ਇਸ ਮਾਮਲੇ ਵਿੱਚ ਫਰੀਦਕੋਟ ਦੀ ਸੱਤਾ ਵਿੱਚ ਭਾਰੂ ਬੈਠੇ ਕਾਂਗਰਸੀ ਅਤੇ ਅਕਾਲੀ ਸਿਆਸਤਦਾਨਾਂ ਨੂੰ ਰਾਜਿੰਦਰ ਵਰਗੇ ਨੌਜਵਾਨ ਆਗੂ ਦੀ ਚੜ੍ਹਤ ਅੱਖ ਦਾ ਰੋੜ ਬਣ ਕੇ ਰੜਕ ਰਹੀ ਹੈ। ਇਹ ਆਪਣੀ ਦਹਿਸ਼ਤ ਅਤੇ ਗੁੰਡਾ ਸ਼ਕਤੀ ਰਾਹੀਂ ਇਸ ਨੂੰ ਡਰਾ ਧਮਕਾ ਆਪਣੇ ਰਸਤੇ ਵਿੱਚੋਂ ਲਾਂਭੇ ਕਰਨਾ ਚਾਹੁੰਦੇ ਹਨ। ਇਸ ਤਰ੍ਹਾਂ ਨਾਲ ਗੁੰਡਾਗਰਦੀ ਵਿਰੋਧੀ ਰਾਜਿੰਦਰ ਸਿੰਘ ਦੀ ਜਥੇਬੰਦੀ ਵੱਲੋਂ ਲੜਿਆ ਜਾ ਰਿਹਾ ਘੋਲ ਮਹਿਜ਼ ਉਸਦੀ ਜਥੇਬੰਦੀ ਦਾ ਘੋਲ ਨਹੀਂ ਬਣ ਜਾਂਦਾ ਬਲਕਿ ਉਹਨਾਂ ਸਭਨਾਂ ਹੀ ਖਰੀਆਂ ਇਨਕਲਾਬੀ-ਜਮਹੂਰੀ ਅਤੇ ਇਨਸਾਫਪਸੰਦ ਜਥੇਬੰਦੀਆਂ ਦੇ ਸਾਂਝੇ ਸਰੋਕਾਰ ਦਾ ਮਾਮਲਾ ਬਣਦਾ ਹੈ, ਜਿਹੜੀ ਵੀ ਇਸ ਗੰਦੇ, ਗਲ਼ੇ-ਸੜੇ ਪ੍ਰਬੰਧ ਨੂੰ ਮੂਲੋਂ ਮੁੱਢੋਂ ਬਦਲਣ ਲਈ ਸੰਘਰਸ਼ਸ਼ੀਲ ਹਨ। 
ਫਰੀਦਕੋਟ ਸਮੇਤ ਪੰਜਾਬ ਦੇ ਹੋਰਨਾਂ ਖੇਤਰਾਂ ਵਿੱਚ ਅਕਾਲੀ ਜਾਂ ਕਾਂਗਰਸੀ ਸਿਆਸਤਦਾਨਾਂ ਨੇ ਆਪਣੀ ਦਹਿਸ਼ਤ ਨਿਸ਼ਾਨ ਸਿੰਘ ਗੁੰਡਾ ਗਰੋਹਾਂ ਅਤੇ ਪੁਲਸੀ ਧਾੜਾਂ ਦੇ ਸਿਰ 'ਤੇ ਜਮਾਈ ਹੋਈ ਹੈ। ਨਿਸ਼ਾਨ ਦੀ ਜ਼ਮੀਨ ਦੀ ਨਿਲਾਮੀ ਹੋਣ ਸਮੇਂ ਸਾਰੇ ਫਰੀਦਕੋਟ ਵਿੱਚੋਂ ਕੋਈ ਇੱਕ ਵੀ ਬੰਦਾ ਖਰੀਦਦਾਰ ਨਹੀਂ ਸੀ ਬਣ ਸਕਿਆ। ਇਸ ਤੋਂ ਪਤਾ ਲੱਗਦਾ ਹੈ ਕਿ ਉਹਨਾਂ ਦੀ ਜੇਲ੍ਹ ਵਿੱਚ ਹੋਣ ਉਪਰੰਤ ਅਜੇ ਵੀ ਕਿੰਨੀ ਦਹਿਸ਼ਤ ਹੈ। ਅਜਿਹੇ ਗੁੰਡਿਆਂ ਦੀ ਦਹਿਸ਼ਤ ਨੂੰ ਚਕਨਾਚੂਰ ਕਰਨ ਲਈ ਲੋਕਾਂ ਨੂੰ ਆਪਣੀ ਸਵੈ-ਰਾਖੀ ਦੀ ਤਾਕਤ ਕਾਇਮ ਕਰਨੀ ਅਣਸਰਦੀ ਲੋੜ ਬਣੀ ਖੜ੍ਹੀ ਹੈ। ਜੇਕਰ ਅਜਿਹੀ ਲੋਕ-ਤਾਕਤ ਨਹੀਂ ਉਸਾਰੀ ਜਾਂਦੀ ਤਾਂ ਆਉਣ ਵਾਲੇ ਸਮੇਂ ਰਾਜਿੰਦਰ ਸਮੇਤ ਹੋਰਨਾਂ 'ਤੇ ਵੀ ਹਮਲੇ ਹੋਣ ਦਾ ਖਦਸ਼ਾ ਬਣਿਆ ਰਹੇਗਾ। 0-0