ਨਕਸਲਬਾੜੀ ਲਹਿਰ ਦੇ ਸ਼ਹੀਦਾਂ ਨੂੰ ਸ਼ਰਧਾਂਜਲੀਆਂ

ਨਕਸਲਬਾੜੀ ਲਹਿਰ ਦੇ ਸ਼ਹੀਦਾਂ ਨੂੰ ਸ਼ਰਧਾਂਜਲੀਆਂ
ਨਕਸਲਬਾੜੀ ਲਹਿਰ ਦੇ ਮੋਢੀ ਆਗੂਆਂ ਕਾਮਰੇਡ ਚਾਰੂ ਮਾਜ਼ੂਮਦਾਰ, ਬਾਬਾ ਬੂਝਾ ਸਿੰਘ ਅਤੇ ਸਮੂਹ ਨਕਸਲਬਾੜੀ ਲਹਿਰ ਦੇ ਸ਼ਹੀਦਾਂ ਦੀ ਯਾਦ ਵਿੱਚ 28 ਜੁਲਾਈ ਦੀ ਸ਼ਾਮ ਨੂੰ ਪਿੰਡ ਚੱਕ ਮਾਈਦਾਸ (ਨੇੜੇ ਨਵਾਂਸ਼ਹਿਰ) ਵਿਖੇ ਸ਼ਹੀਦੀ ਯਾਦਗਾਰ ਕਮੇਟੀ ਵੱਲੋਂ ਸ਼ਰਧਾਂਜਲੀ ਸਮਾਗਮ ਕੀਤਾ ਗਿਆ। ਸ਼ਰਧਾਂਜਲੀ ਸਮਾਗਮ ਦੀ ਸ਼ੁਰੂਆਤ ਸ਼ਹੀਦਾਂ ਦੀ ਯਾਦ ਵਿੱਚ 2 ਮਿੰਟ ਦਾ ਮੌਨ ਰੱਖਣ ਤੋਂ ਬਾਅਦ ਲੋਕ ਕਾਫ਼ਲਾ ਦੇ ਸੰਪਾਦਕ ਬੂਟਾ ਸਿੰਘ, ਸੁਰਖ਼ ਰੇਖਾ ਦੇ ਐਕਟਿੰਗ ਨਾਜ਼ਰ ਸਿੰਘ ਬੋਪਾਰਾਏ, ਹਰਪਾਲ ਸਿੰਘ ਤੇ ਹੋਰਨਾਂ ਵੱਲੋਂ ਸ਼ਹੀਦੀ ਲਾਟ 'ਤੇ ਫੁੱਲ ਅਰਪਤ ਕਰਕੇ ਸ਼ਰਧਾਂਜਲੀ ਭੇਟ ਕਰਕੇ ਕੀਤੀ ਗਈ। ਇਸ ਸ਼ਰਧਾਂਜਲੀ ਸਮਾਗਮ ਵਿੱਚ ਪਿੰਡ ਚੱਕ ਮਾਈਦਾਸ ਅਤੇ ਇਲਾਕੇ ਭਰ 'ਚੋਂ ਪਹੁੰਚੇ ਹੋਏ ਸਾਥੀਆਂ ਨੂੰ ਉਪਰੋਕਤ ਆਗੂਆਂ ਨੇ ਸ਼ਹੀਦ ਸਾਥੀਆਂ ਦੀ ਕੀਤੀ ਹੋਈ ਘਾਲਣਾ ਨੂੰ ਲੋਕਾਂ ਨਾਲ ਸਾਂਝਾ ਕਰਦਿਆਂ ਅੱਜ ਦੇ ਸਮੇਂ ਵਿੱਚ ਨਕਸਲਬਾੜੀ ਲਹਿਰ ਦੇ ਹਥਿਆਰਬੰਦ ਰਾਹ ਨੂੰ ਅਪਣਾਉਣ ਦਾ ਸੱਦਾ ਦਿੰਦਿਆਂ ਕਿਹਾ ਕਿ ਇਹੋ ਹੀ ਇੱਕੋ ਇੱਕ ਰਾਹ ਹੈ ਜੋ ਸੋਧਵਾਦੀਆਂ ਅਤੇ ਨਵ-ਸੋਧਵਾਦੀਆਂ ਵਿੱਚ ਬੁਨਿਆਦੀ ਨਿਖੇੜੇ ਦੀ ਲਕੀਰ ਖਿੱਚਦਾ ਹੈ ਅਤੇ ਜਿਸ ਨੇ ਅੱਜ ਵੀ ਸਮੇਂ ਦੀ ਹਕੂਮਤ ਨਾਲ ਮੱਥਾ ਲਾਇਆ ਹੋਇਆ ਹੈ ਤੇ ਭਾਰਤ ਵਿੱਚ ਲੋਕਾਂ ਲਈ ਇਹ ਰਾਹ ਦਰਸਾਵਾ ਬਣਨ ਵੱਲ ਵਧ ਰਿਹਾ ਹੈ।
ਕਾਮਰੇਡ ਦਰਸ਼ਨ ਦੁਸਾਂਝ ਦੀ ਬਰਸੀ ਮੌਕੇ ਸ਼ਰਧਾਂਜਲੀਆਂ
ਨਕਸਲਬਾੜੀ ਲਹਿਰ ਦੇ ਉੱਘੇ ਆਗੂ ਕਾਮਰੇਡ ਦਰਸ਼ਨ ਸਿੰਘ ਦੁਸਾਂਝ ਦੀ 18ਵੀਂ ਬਰਸੀ 'ਤੇ ਸ਼ਹੀਦੀ ਯਾਦਗਾਰ ਕਮੇਟੀ, ਸ਼ਹੀਦ ਭਗਤ ਸਿੰਘ ਨਗਰ (ਨਵਾਂਸ਼ਹਿਰ) ਅਤੇ ਜਲੰਧਰ ਵੱਲੋਂ ਉਹਨਾਂ ਦੇ ਪਿੰਡ ਦੁਸਾਂਝ ਕਲਾਂ ਵਿੱਚ ਸ਼ਰਧਾਂਜਲੀ ਸਮਾਗਮ ਕੀਤਾ ਗਿਆ, ਜਿਸ ਦੀ ਤਿਆਰੀ ਵਜੋਂ ਕਮੇਟੀ ਨੇ ਪਿੰਡ ਦੇ ਵਿਅਕਤੀਆਂ ਨਾਲ ਮਿਲ ਕੇ ਪ੍ਰੋਗਰਾਮ ਨੂੰ ਸਫਲ ਕਰਨ ਲਈ ਤਿਆਰੀ ਕਮੇਟੀ ਬਣਾਈ, ਜਿਸ ਵੱਲੋਂ ਦੁਸਾਂਝ ਦੀ ਜ਼ਿੰਦਗੀ ਦੇ ਸਫਰ ਦੀ ਸੰਖੇਪ ਜਾਣਕਾਰੀ ਦਿੰਦਾ ਹੱਥ-ਪਰਚਾ ਘਰ ਘਰ ਪਹੁੰਚਾਇਆ। ਪਿੰਡ ਵਿੱਚ ਅਤੇ ਪਿੰਡ ਦੇ ਅੱਡੇ ਤੋਂ ਇਲਾਵਾ ਫਲੈਕਸਾਂ ਰਾਹੀਂ ਜਾਣਕਾਰੀ ਦਿੰਦੇ ਪੋਸਟਰ ਵੀ ਲਗਾਏ ਗਏ।
ਸ਼ਰਧਾਂਜਲੀ ਸਮਾਗਮ ਮੌਕੇ ਸਭ ਤੋਂ ਪਹਿਲਾਂ ਸ਼ਹੀਦਾਂ ਦੀ ਯਾਦ ਵਿੱਚ ਕਾਮਰੇਡ ਦਰਸ਼ਨ ਦੁਸਾਂਝ ਦੀ ਭੈਣ ਜੀ, ਸ੍ਰੀਮਤੀ ਮਹਿੰਦਰ ਕੌਰ, ਹਰਪਾਲ ਸਿੰਘ, ਗੁਰਦੇਵ ਸਿੰਘ ਦੁਸਾਂਝ ਕਲਾਂ, ਸੁਰਖ਼ ਰੇਖਾ ਦੇ ਐਕਟਿੰਗ ਸੰਪਾਦਕ ਨਾਜ਼ਰ ਸਿੰਘ ਬੋਪਾਰਾਏ ਅਤੇ ਕਮੇਟੀ ਦੇ ਕਨਵੀਨਰ ਬੂਟਾ ਸਿੰਘ ਵੱਲੋਂ ਸਾਂਝੇ ਤੌਰ 'ਤੇ ਝੰਡਾ ਲਹਿਰਾਇਆ ਗਿਆ ਅਤੇ ਦੋ ਮਿੰਟ ਦਾ ਮੋਨ ਧਾਰ ਕੇ ਸ਼ਹੀਦਾਂ ਨੂੰ ਸ਼ਰਧਾਂਜਲੀ ਭੇਟ ਕੀਤੀ ਗਈ।
ਕਾਮਰੇਡ ਦੁਸਾਂਝ ਨੂੰ ਸ਼ਰਧਾਂਜਲੀ ਭੇਟ ਕਰਦਿਆਂ ਸ੍ਰੀਮਤੀ ਮਹਿੰਦਰ ਕੌਰ, ਹਰਪਾਲ ਸਿੰਘ, ਨਾਜ਼ਰ ਸਿੰਘ ਬੋਪਾਰਾਏ ਅਤੇ ਕਮੇਟੀ ਦੇ ਕਨਵੀਨਰ ਬੂਟਾ ਸਿੰਘ ਨੇ ਕਮਿਊਨਿਸਟ ਇਨਕਾਬੀ ਨਕਸਲਬਾੜੀ ਲਹਿਰ ਵਿੱਚ ਕਾਮਰੇਡ ਦਰਸ਼ਨ ਦੁਸਾਂਝ ਦੇ ਅਮਿੱਟ ਯੋਗਦਾਨ, ਉਹਨਾਂ ਦੀ ਮਿਸਾਲੀ, ਸਿਰੜੀ ਇਨਕਲਾਬੀ ਜ਼ਿੰਦਗੀ ਅਤੇ ਕੁਰਬਾਨੀ ਨੂੰ ਚੇਤੇ ਕੀਤਾ ਨਕਸਲਬਾੜੀ ਤੋਂ ਪ੍ਰੇਰਤ ਹੋ ਕੇ ਨਵ-ਜਮਹੂਰੀ ਇਨਕਲਾਬ ਅਤੇ ਲਮਕਵੇਂ ਲੋਕ-ਯੁੱਧ ਦੀ ਲੀਹ ਨੂੰ ਬੁਲੰਦ ਕੀਤਾ। ਆਖਰੀ ਸਾਹ ਤੱਕ ਏਸੇ 'ਤੇ ਹੀ ਡਟ ਕੇ ਪਹਿਰਾ ਦਿੱਤਾ। ਇਸ ਮੌਕੇ ਆਜ਼ਾਦ ਰੰਗ-ਮੰਚ ਵੱਲੋਂ ''ਸੜਕ 'ਤੇ ਰੋੜੀ ਕੁੱਟ ਰਹੀਆਂ ਮੁਟਿਆਰਾਂ ਨੂੰ ਦੇਖੋ'' ਗੀਤ ਉੱਪਰ ਕੋਰੀਓਗ੍ਰਾਫੀ ਪੇਸ਼ ਕੀਤੀ ਗਈ। ਪਰਮਜੀਤ ਚੱਕਦੇਸ ਰਾਜ ਨੇ ''ਲਾਲ ਝੰਡਿਆ ਉੱਚਾ ਰੱਖੀਂ ਤੂੰ ਫਰਾਰ, ਹਵਾ ਦੇਣਗੇ ਜੁਝਾਰੂ ਤੈਨੂੰ ਸਮੇਂ ਸਮੇਂ ਨਾਲ'' ਰਾਹੀਂ ਸ਼ਰਧਾਂਜਲੀ ਭੇਟ ਕੀਤੀ। ਇਸ ਤੋਂ ਇਲਾਵਾ ਬਾਲੀ ਰਾਮ, ਡਾ. ਸੁਖਦੇਵ ਗੁਰੂ ਹੋਰਾਂ ਵੱਲੋਂ ਗੀਤ ਪੇਸ਼ ਕੀਤੇ ਗਏ, ਪਿੰਡ ਦੁਸਾਂਝ ਕਲਾਂ ਤੋਂ ਮਾ. ਸ਼ਿੰਗਾਰਾ ਸਿੰਘ, ਕਾਮਰੇਡ ਗੁਰਦੇਵ ਸਿੰਘ ਹੋਰਾਂ ਨੇ ਕਾਮਰੇਡ ਦੁਸਾਂਝ ਨਾਲ ਜੁੜੀਆਂ ਆਪਣੀਆਂ ਯਾਦਾਂ ਸਾਂਝੀਆਂ ਕੀਤੀਆਂ ਅਤੇ ਆਏ ਹੋਏ ਸਾਥੀਆਂ ਦਾ ਧੰਨਵਾਦ ਕੀਤਾ। ਦੁਸਾਂਝ ਕਲਾਂ ਪਿੰਡ ਤੋਂ ਆਰ.ਐਮ.ਪੀ.ਆਈ. ਦੇ ਸਾਥੀ ਤੇ ਜਸਵੀਰ ਸਿੰਘ ਅਤੇ ਮਹਿੰਦਰ ਸਿੰਘ ਖੈਰੜ ਦੀ ਅਗਵਾਈ ਵਿੱਚ ਸੀ.ਪੀ.ਆਈ.(ਐਮ.ਐਲ.) ਨਿਊ-ਡੈਮੋਕਰੇਸੀ ਦੇ ਸਾਥੀ ਵੀ ਇਸ ਸਮਾਗਮ ਵਿੱਚ ਸ਼ਾਮਲ ਹੋਏ।
----------------------------
ਸ਼ੋਕ ਸਮਾਚਾਰ
-ਨਕਸਲਬਾੜੀ ਲਹਿਰ ਦੇ ਸ਼ਹੀਦ ਸਾਥੀ ਤਰਸੇਮ ਬਾਵਾ ਦੇ ਮਾਤਾ ਜੀ 27 ਜੁਲਾਈ ਨੂੰ ਸੰਖੇਪ ਜਿਹੀ ਬਿਮਾਰੀ ਉਪਰੰਤ ਵਿੱਛੜ ਗਏ। 28 ਜੁਲਾਈ ਨੂੰ ਉਹਨਾਂ ਦਾ ਅੰਤਿਮ ਸਸਕਾਰ ਹੋਇਆ ਅਤੇ 5 ਅਗਸਤ ਨੂੰ ਸ਼ਰਧਾਂਜਲੀ ਸਮਾਗਮ ਹੋਇਆ ਜਿਸ ਵਿੱਚ ਸੈਂਕੜੇ ਲੋਕਾਂ ਨੇ ਹਿੱਸਾ ਲੈ ਕੇ ਸ਼ਰਧਾ ਦੇ ਫੁੱਲ ਅਰਪਤ ਕੀਤੇ।
-ਸਾਥੀ ਪਿਆਰਾ ਦੀਨ (ਪਟਿਆਲਾ) ਦੀ ਜੀਵਨ ਸਾਥਣ ਸ੍ਰੀਮਤੀ ਕੁਲਦੀਪ ਕਾਫੀ ਲੰਮੀ ਬਿਮਾਰੀ ਉਪਰੰਤ ਇਨਕਲਾਬੀ ਲਹਿਰ ਦੇ ਕਾਫ਼ਲੇ ਵਿੱਚੋਂ ਵਿਛੜ ਗਏ। ਉਹਨਾਂ ਇਨਕਲਾਬੀ ਜਮਹੂਰੀ ਲਹਿਰ ਅਤੇ ਟਰੇਡ ਯੂਨੀਅਨ ਲਹਿਰ ਵਿੱਚ ਸਰਗਰਮ ਸਾਥੀ ਪਿਆਰਾ ਦੀਨ ਦੀਆਂ ਸਰਗਰਮੀਆਂ ਦੌਰਾਨ ਉਹਨਾਂ ਦਾ ਨਾ ਸਿਰਫ ਹਮਾਇਤੀ ਸਾਥ ਨਿਭਾਇਆ, ਸਗੋਂ ਵਾਹ ਲੱਗਦੀ ਖੁਦ ਵੀ ਸਰਗਰਮੀਆਂ ਵਿੱਚ ਸ਼ਮੂਲੀਅਤ ਵੀ ਕਰਦੇ ਰਹੇ।
-ਇਨਕਲਾਬੀ ਲਹਿਰ ਦੇ ਸਿਰਕੱਢ ਕਾਰਕੁੰਨ ਸਾਥੀ ਬਲਵੰਤ ਮੱਖੂ ਦੀ ਮਾਤਾ ਜੀ ਦੀ ਮੌਤ ਹੋ ਗਈ। ਉਹਨਾਂ ਦੀ ਯਾਦ ਵਿੱਚ ਹੋਏ ਸ਼ਰਧਾਂਜਲੀ ਸਮਾਗਮ ਵਿੱਚ ਦੂਰੋਂ-ਨੇੜਿਉਂ ਅਨੇਕਾਂ ਸਾਥੀਆਂ ਨੇ ਹਿੱਸਾ ਲਿਆ।
-ਸਾਥੀ ਕਿਸ਼ੋਰੀ ਲਾਲ ਪਟਿਆਲਾ, ਪਿਛਲੇ ਦਿਨੀਂ ਇਨਕਲਾਬੀ ਲਹਿਰ ਦੇ ਕਾਫ਼ਲੇ ਵਿੱਚੋਂ ਸਦਾ ਲਈ ਵਿੱਛੜ ਗਏ। ਇਹ ਸਾਥੀ ਭਾਵੇਂ ਇਸ ਦੁਨੀਆਂ ਨੂੰ ਦੇਖ ਨਹੀਂ ਸਨ ਸਕਦੇ ਪਰ ਜਿਵੇਂ ਉਸ ਨੇ ਦੁਨੀਆਂ ਨੂੰ ਸੁਣ ਕੇ ਸਮਝਿਆ ਉਸ ਵਿਚੋਂ ਉਸ ਨੂੰ ਜਾਪਦਾ ਸੀ ਕਿ ਇਹ ਦੁਨੀਆਂ ਬਦਲ ਕੇ ਨਵੀਂ ਸਿਰਜਣੀ ਪੈਣੀ ਹੈ, ਇਸ ਵਿੱਚ ਇਹ ਸਾਥੀ ਖੁਦ ਆਪ, ਇਕੱਲੇ ਤੌਰ 'ਤੇ ਵੀ ਕਾਫੀ ਹਿੱਸਾਪਾਈ ਕਰਦਾ ਰਿਹਾ। ਦੁਨੀਆਂ ਨੂੰ ਨਾ ਦੇਖ ਸਕਣ ਦੇ ਬਾਵਜੂਦ ਵੀ ਅਨੇਕਾਂ ਹੀ ਕੰਮ ਕਰ ਜਾਣੇ ਅਤੇ ਹੋਰਨਾਂ ਲਈ ਪ੍ਰੇਰਨਾ ਸਰੋਤ ਬਣਨਾ ਇਹ ਕੁੱਝ ਸਾਥੀ ਕਿਸ਼ੋਰੀ ਲਾਲ ਦੇ ਹਿੱਸੇ ਆਇਆ ਹੈ।
-ਸ਼ਹੀਦ ਇਕਬਾਲ ਸਿੰਘ ਮੰਗੂਵਾਲ ਦੇ ਸਪੁੱਤਰ ਸ੍ਰੀ ਬਹਾਦਰ ਸਿੰਘ ਦੀ ਸੰਖੇਪ ਜਿਹੀ ਬਿਮਾਰੀ ਉਪਰੰਤ ਮੌਤ ਹੋ ਗਈ। ਬਹਾਦਰ ਸਿੰਘ 31 ਦਸੰਬਰ 1970 ਨੂੰ ਪੈਦਾ ਹੋਇਆ ਸੀ, ਜਦੋਂ ਕਿ ਉਸਦਾ ਪਿਤਾ ਇਕਬਾਲ ਸਿੰਘ 1 ਜਨਵਰੀ 1971 ਨੂੰ ਸ਼ਹੀਦੀ ਪ੍ਰਾਪਤ ਕਰ ਗਿਆ।
-ਨਰਿੰਦਰ ਸਿੰਘ ਕੋਟਲਾ ਬਾਮਾ ਗੁਰਦਾਸਪੁਰ ਜ਼ਿਲ੍ਹਾ ਜਨਰਲ ਸਕੱਤਰ ਭਾਰਤੀ ਕਿਸਾਨ ਯੂਨੀਅਨ ਏਕਤਾ, ਦੀ ਪਤਨੀ ਸ੍ਰੀਮਤੀ ਬਲਵਿੰਦਰ ਕੌਰ ਲੰਮੇ ਸਮੇਂ ਕੈਂਸਰ ਦੀ ਬਿਮਾਰੀ ਨਾਲ ਪੀੜਤ ਸੀ, 3 ਅਗਸਤ ਨੂੰ ਮੌਤ ਹੋ ਗਈ।
-ਅਜੀਤ ਸਿੰਘ ਲੀਲ ਕਲਾਂ (ਕਾਦੀਆਂ) ਦੀ ਪਤਨੀ ਸ੍ਰੀਮਤੀ ਗੁਰਬਚਨ ਕੌਰ ਦੀ ਅਚਨਚੇਤੀ ਮੌਤ ਹੋ ਗਈ ਹੈ।
(ਅਦਾਰਾ ਸੁਰਖ਼ ਰੇਖਾ ਇਹਨਾਂ ਵਿਛੜੇ ਸਾਥੀਆਂ ਦੇ ਪਰਿਵਾਰਾਂ, ਰਿਸ਼ਤੇਦਾਰਾਂ, ਮਿੱਤਰਾਂ-ਦੋਸਤਾਂ ਦੇ ਦੁੱਖਾਂ ਵਿੱਚ ਸ਼ਰੀਕ ਹੁੰਦਾ ਡੂੰਘੇ ਦੁੱਖ ਦਾ ਇਜ਼ਹਾਰ ਕਰਦਾ ਹੈ।)