ਮਾਓ-ਜ਼ੇ-ਤੁੰਗ ਦੀ 40ਵੀਂ ਬਰਸੀ

ਮਾਓ-ਜ਼ੇ-ਤੁੰਗ ਦੀ 40ਵੀਂ ਬਰਸੀ 'ਤੇ

ਜ਼ਰੱਈ ਇਨਕਲਾਬੀ ਜੰਗ ਦੀ ਉਸਾਰੀ ਬਨਾਮ ਸੱਜੇ ਸੋਧਵਾਦ ਦੀ ਇੱਕ ਵੰਨਗੀ

-ਨਵਜੋਤ

9 ਸਤੰਬਰ 2016 ਨੂੰ ਕੌਮਾਂਤਰੀ ਪ੍ਰੋਲੇਤਾਰੀ ਦੇ ਮਹਾਨ ਰਹਿਬਰ ਮਾਓ-ਜ਼ੇ-ਤੁੰਗ ਦੀ 40ਵੀਂ ਬਰਸੀ ਹੈ। ਉਹ ਕਥਨੀ ਅਤੇ ਕਰਨੀ ਦੇ ਸੁਮੇਲ ਦੇ ਮਹਾਨ ਮੁਜੱਸਮਾ ਸਨ। ਚੀਨੀ ਇਨਕਲਾਬ ਲਈ ਲੜੀ ਗਈ ਜੰਗ ਦੀਆਂ ਤਰਥੱਲੀਆਂ ਦੌਰਾਨ ਅਤੇ ਖੁਰਸ਼ਚੇਵ ਮਾਰਕਾ ਸੱਜੇ ਸੋਧਵਾਦ ਨਾਲ ਲੋਹਾ ਲੈਂਦਿਆਂ, ਉਹਨਾਂ ਵੱਲੋਂ ਮਾਰਕਸਵਾਦ-ਲੈਨਿਨਵਾਦ ਨੂੰ ਵਿਕਸਤ ਕਰਦਿਆਂ ਮਾਓ-ਜ਼ੇ-ਤੁੰਗ ਵਿਚਾਰਾਧਾਰਾ ਦੀ ਟੀਸੀ ਤੱਕ ਪਹੁੰਚਾਇਆ ਗਿਆ ਅਤੇ ਪ੍ਰੋਲੇਤਾਰੀ ਦਾ ਇਹ ਅਮਿੱਟ ਵਿਗਿਆਨਕ-ਵਿਚਾਰਧਾਰਕ ਖਜ਼ਾਨਾ ਮਾਰਕਸਵਾਦ-ਲੈਨਿਨਵਾਦ-ਮਾਓ ਵਿਚਾਰਧਾਰਾ ਬਣ ਗਿਆ। 
ਲਮਕਵਾਂ ਲੋਕ-ਯੁੱਧ ਮਾਓ-ਜ਼ੇ-ਤੁੰਗ ਵਿਚਾਰਧਾਰਾ ਦੇ ਅਮਿੱਟ ਖਜ਼ਾਨੇ ਦਾ ਇੱਕ ਅਨਿੱਖੜਵਾਂ ਅਤੇ ਬੁਨਿਆਦੀ ਅੰਗ ਹੈ। ਲਮਕਵਾਂ ਲੋਕ ਯੁੱਧ ਸਭਨਾਂ ਅਰਧ-ਜਾਗੀਰੂ ਅਰਧ-ਬਸਤੀਵਾਦੀ ਮੁਲਕਾਂ ਦੇ ਸਾਮਰਾਜ ਵਿਰੋਧੀ ਅਤੇ ਜਾਗੀਰਦਾਰ ਵਿਰੋਧੀ ਇਨਕਲਾਬਾਂ (ਨਵ-ਜਮਹੂਰੀ ਇਨਕਲਾਬਾਂ) ਦੀ ਫੌਜੀ ਯੁੱਧਨੀਤੀ ਜਾਂ ਫੌਜੀ ਲੀਹ ਹੈ। ਲਮਕਵੇਂ ਲੋਕ ਦੇ ਪੰਜ ਬੁਨਿਆਦੀ/ਮੂਲ ਪੱਖ ਇਹ ਬਣਦੇ ਹਨ: (1) ਪ੍ਰੋਲੇਤਾਰੀ ਪਾਰਟੀ ਦੀ ਅਗਵਾਈ ਹੇਠ ਹਥਿਆਰਬੰਦ ਘੋਲ ਸੰਘਰਸ਼ ਦੀ ਪ੍ਰਮੁੱਖ ਸ਼ਕਲ ਹੋਵੇਗੀ ਅਤੇ ਫੌਜ ਜਨਤਾ ਦੀ ਜਥੇਬੰਦੀ ਦੀ ਪ੍ਰਮੁੱਖ ਸ਼ਕਲ ਹੋਵੇਗੀ; (2) ਹਥਿਆਰਬੰਦ ਘੋਲ ਲਮਕਵੀਂ ਗੁਰੀਲਾ ਜੰਗ ਦੀ ਸ਼ਕਲ ਅਖਤਿਆਰ ਕਰੇਗਾ; ਇਸਦੇ ਸਿਲਸਿਲੇਵਾਰ ਵਿਕਾਸ ਨਾਲ ਇਹ ਚਲਾਇਮਾਨ ਜੰਗ ਅਤੇ ਟਿਕਵੀਂ ਜੰਗ ਦੀਆਂ ਸ਼ਕਲਾਂ ਵੀ ਅਖਤਿਆਰ ਕਰੇਗਾ; (3) ਨਵ-ਜਮਹੂਰੀ ਇਨਕਲਾਬ ਦੇ ਸਮੁੱਚੇ ਦੌਰ ਅੰਦਰ ਇਹ, ਤੱਤ ਰੂਪ ਵਿੱਚ ਕਿਸਾਨ ਜੰਗ ਹੋਵੇਗਾ; (4) ਹਥਿਆਰਬੰਦ ਘੋਲ ਪ੍ਰਮੁੱਖ ਤੌਰ 'ਤੇ ਕਿਸਾਨ ਜਨਤਾ ਅਤੇ ਪੇਂਡੂ ਖੇਤਰ ਵਿੱਚ ਕੇਂਦਰਤ ਹੋਣ ਕਰਕੇ, ਸਿਆਸੀ ਤਾਕਤ ਨੂੰ ਪਹਿਲਾਂ ਪੇਂਡੂ ਖੇਤਰ ਅੰਦਰ ਆਧਾਰ ਇਲਾਕੇ ਸਥਾਪਤ ਕਰਦਿਆਂ ਖੋਹਿਆ ਜਾਵੇਗਾ ਅਤੇ ਇਉਂ, ਸ਼ਹਿਰਾਂ ਨੂੰ ਘੇਰਦਿਆਂ, ਅਖੀਰ ਉੱਥੇ ਸਿਆਸੀ ਸੱਤਾ 'ਤੇ ਕਾਬਜ਼ ਹੋਇਆ ਜਾਵੇਗਾ; (5) ਹਥਿਆਰਬੰਦ ਘੋਲ ਇਨਕਲਾਬ ਦਾ ਇੱਕ ਬੁਨਿਆਦੀ ਸੁਆਲ/ਇੱਕ ਬੁਨਿਆਦੀ ਲੱਛਣ/ਇੱਕ ਪ੍ਰਮੁੱਖ ਹਥਿਆਰ ਹੈ, ਜਿਹੜਾ ਇਨਕਲਾਬ ਦੇ ਦੋ ਹੋਰਨਾਂ ਬੁਨਿਆਦੀ ਸੁਆਲਾਂ/ਬੁਨਿਆਦੀ ਲੱਛਣਾਂ/ਪ੍ਰਮੁੱਖ ਜਾਦੂਮਈ ਹਥਿਆਰਾਂ— ਇਨਕਲਾਬੀ ਸਾਂਝੇ ਮੋਰਚੇ ਅਤੇ ਕਮਿਊਨਿਸਟ ਪਾਰਟੀ— ਨਾਲ ਅਨਿੱਖੜਵੇਂ/ਇੱਕਦੇਹ ਰੂਪ ਵਿੱਚ ਜੁੜਿਆ ਹੋਇਆ ਹੈ। 
ਇਹਨਾਂ ਵਿੱਚੋਂ ਪਹਿਲਾ ਪੱਖ ਲਮਕਵੇਂ ਲੋਕ ਯੁੱਧ ਦੀ ਟੇਕ ਬਣਦਾ ਹੈ। 
ਇਹਨਾਂ ਪੰਜਾਂ ਵਿੱਚ ਇੱਕ ਬੁਨਿਆਦੀ/ਮੂਲ ਪੱਖ ਹੈ ਕਿ ਨਵ-ਜਮਹੂਰੀ ਇਨਕਲਾਬ ਦੇ ਸਮੁੱਚੇ ਦੌਰ ਅੰਦਰ ਇਹ, ਤੱਤ ਰੂਪ ਵਿੱਚ, ਕਿਸਾਨ ਜੰਗ ਹੋਵੇਗਾ। ਮਾਓ-ਜ਼ੇ-ਤੁੰਗ ਵੱਲੋਂ ਚੀਨ ਅੰਦਰ ਚੱਲੇ ਲਮਕਵੇਂ ਹਥਿਆਰਬੰਦ ਘੋਲ ਬਾਰੇ ਗੱਲ ਕਰਦਿਆਂ ਕਿਹਾ ਗਿਆ ਸੀ ਕਿ ''ਚੀਨ ਅੰਦਰ ਹਥਿਆਰਬੰਦ ਘੋਲ ਤੱਤ ਰੂਪ ਵਿੱਚ ਕਿਸਾਨ ਜੰਗ ਹੈ ਅਤੇ ਕਿਸਾਨੀ ਨਾਲ ਪਾਰਟੀ ਦੇ ਸਬੰਧ ਅਤੇ ਇਸਦੇ ਕਿਸਾਨ ਜੰਗ ਨਾਲ ਨੇੜਲੇ ਸਬੰਧ ਇੱਕੋ ਅਤੇ ਉਹੀ ਚੀਜ਼ ਹਨ।) (ਕਮਿਊਨਿਸਟ ਨਾਲ ਜਾਣ-ਪਛਾਣ, ਗ੍ਰੰਥ-2 ਸਫਾ 287) ''ਚੀਨੀ ਕਮਿਊਨਿਸਟ ਪਾਰਟੀ ਦੁਆਰਾ ਵਿੱਢਿਆ ਹਥਿਆਰਬੰਦ ਘੋਲ ਪ੍ਰੋਲੇਤਾਰੀ ਦੀ ਅਗਵਾਈ ਹੇਠਲੀ ਕਿਸਾਨ ਜੰਗ ਹੈ। (ਹਵਾਲਾ ਉਹੀ, ਸਫਾ-291) ਇਹ ਕਿਸਾਨ ਜੰਗ ਕਿਸਾਨ ਜਨਤਾ ਦੀ ਹਥਿਆਰਬੰਦ ਫੌਜੀ ਜਥੇਬੰਦੀ ਦੇ ਸਿਰ 'ਤੇ ਹੀ ਲੜੀ ਜਾ ਸਕਦੀ ਹੈ। ਅਜਿਹੀ ਕਿਸਾਨ ਜੰਗ ਕਿਉਂਕਿ ਮੌਜੂਦਾ ਪਿਛਾਖੜੀ ਰਾਜ ਦੇ ਖਿਲਾਫ ਜੰਗ ਹੈ, ਇਸ ਨੂੰ ਤਹਿਸ਼-ਨਹਿਸ਼ ਕਰਦੇ ਹੋਏ ਨਵ-ਜਮਹੂਰੀ ਰਾਜ ਸਥਾਪਤ ਕਰਨ ਲਈ ਲੜੀ ਜਾ ਰਹੀ ਜੰਗ ਹੈ। ਇਸ ਲਈ, ਅਜਿਹੀ ਜੰਗ ਦੀ ਚਾਹੇ ਤਿਆਰੀ ਦਾ ਅਮਲ ਹੈ ਅਤੇ ਚਾਹੇ ਤਿਆਰੀ ਤੋਂ ਬਾਅਦ ਜੰਗ ਛੇੜਨ ਤੇ ਚਲਾਉਣ ਦਾ ਅਮਲ ਹੈ, ਇਹ ਖੁੱਲ•ੇਆਮ ਅਤੇ ਕਾਨੂੰਨੀ ਵਲਗਣਾਂ ਅੰਦਰ ਰਹਿ ਕੇ ਕਦਾਚਿਤ ਨਹੀਂ ਚਲਾਏ ਜਾ ਸਕਦੇ। ਇਹ ਸਾਰਾ ਅਮਲ ਪਿਛਾਖੜੀ ਹਾਕਮ ਜਮਾਤਾਂ ਦੀਆਂ ਨਜ਼ਰਾਂ ਵਿੱਚ ਬਗਾਵਤ ਦੀ ਤਿਆਰੀ ਹੈ, ਬਗਾਵਤ ਹੈ, ''ਖੱਬੇ ਪੱਖੀ ਅੱਤਵਾਦ'' ਹੈ, ਰਾਜ-ਭਾਗ ਤੋਂ ਨਾਬਰੀ ਹੈ— ਇਸ ਲਈ ਇਹ ਵਰਜਿਤ ਹੈ, ਅਤੇ ਇਹ ਹਿੰਸਕ ਰਾਜ ਦੀ ''ਕੁਚਲ ਦਿਓ'' ਦੀ ਵਹਿਸ਼ੀਆਨਾ ਮਾਰ ਹੇਠ ਆਉਣ ਲਈ ਬੱਝਿਆ ਹੋਇਆ ਹੈ। ਇਸ ਲਈ ਕਿਸਾਨ ਜੰਗ (ਇਨਕਲਾਬੀ ਜ਼ਰੱਈ ਜੰਗ) ਦੀ ਤਿਆਰੀ ਦਾ ਅਮਲ ਐਨ ਸ਼ੁਰੂ ਤੋਂ ਹੀ ਗੈਰ-ਕਾਨੂੰਨੀ ਅਤੇ ਗੁਪਤ ਫੌਜੀ-ਸਿਆਸੀ ਤਰਜ਼ੇ-ਅਮਲ ਅਤੇ ਵਿਉਂਤਬੰਦੀ ਰਾਹੀਂ ਚਲਾਉਣ ਦੀ ਸ਼ਰਤੀਆ ਲੋੜ ਖੜ•ੀ ਹੁੰਦੀ ਹੈ। ਇਸ ਅਮਲ ਨੂੰ ਆਪਣੀ ਪ੍ਰਮੁੱਖ ਧੁੱਸ ਬਣਾਉਂਦਿਆਂ, ਸੰਘਰਸ਼ ਅਤੇ ਜਥੇਬੰਦੀ ਦੀਆਂ ਕਾਨੂੰਨੀ, ਖੁੱਲ•ੀਆਂ ਅਤੇ ਪੁਰਅਮਨ ਘੋਲ-ਸ਼ਕਲਾਂ ਅਤੇ ਜਥੇਬੰਦੀਆਂ ਦੀ ਅਣਸਰਦੀ ਲੋੜ ਅਤੇ ਅਹਿਮੀਅਤ ਨੂੰ ਨਜ਼ਰਅੰਦਾਜ਼ ਨਹੀਂ ਕਰਨਾ ਚਾਹੀਦਾ। ਚਾਹੇ ਇਹਨਾਂ ਦਾ ਰੋਲ ਅਤੇ ਸਥਾਨ ਦੋਮ ਬਣਦਾ ਹੈ ਅਤੇ ਕਿਸਾਨ ਜੰਗ ਤੇ ਜਥੇਬੰਦੀ ਦੇ ਮਾਤਹਿਤ ਬਣਦਾ ਹੈ। 
ਇਸਦਾ ਮਤਲਬ ਹੈ ਕਿ ਇਨਕਲਾਬੀ ਕਿਸਾਨ ਸੰਘਰਸ਼/ਜ਼ਰੱਈ ਇਨਕਲਾਬੀ ਲਹਿਰ ਸਭਨਾਂ ਕਿਸਮਾਂ ਦੀਆਂ ਘੋਲ ਸ਼ਕਲਾਂ ਅਤੇ ਜਥੇਬੰਦੀਆਂ— ਗੈਰ-ਕਾਨੂੰਨੀ ਅਤੇ ਕਾਨੂੰਨੀ, ਗੁਪਤ ਅਤੇ ਖੁੱਲ•ੀਆਂ, ਅਤੇ ਹਥਿਆਰਬੰਦ ਅਤੇ ਪੁਰਅਮਨ ਘੋਲ/ਸਰਗਰਮੀ ਅਤੇ ਜਥੇਬੰਦੀ ਦੀਆਂ ਸ਼ਕਲਾਂ ਨੂੰ ਆਪਣੇ ਕਲਾਵੇਂ ਵਿੱਚ ਲੈ ਕੇ ਚੱਲਦੀ ਹੈ। ਇਹਨਾਂ ਵਿੱਚ ਗੈਰ-ਕਾਨੂੰਨੀ, ਗੁਪਤ ਅਤੇ ਹਥਿਆਰਬੰਦ ਘੋਲ ਅਤੇ ਜਥੇਬੰਦੀਆਂ ਦੀਆਂ ਸ਼ਕਲਾਂ ਪ੍ਰਮੁੱਖ ਹੁੰਦੀਆਂ ਹਨ। ਕਾਨੂੰਨੀ, ਖੁੱਲ•ੀਆਂ ਅਤੇ ਪੁਰਅਮਨ ਘੋਲ ਅਤੇ ਜਥੇਬੰਦੀ ਦੀਆਂ ਸ਼ਕਲਾਂ ਦੋਮ ਹੁੰਦੀਆਂ ਹਨ ਅਤੇ ਪਹਿਲੀਆਂ ਦੇ ਮਾਤਹਿਤ ਰਹਿੰਦੀਆਂ ਹਨ। 
ਪਰ ਭਾਰਤੀ ਕਮਿਊਨਿਸਟ ਲਹਿਰ ਦੇ ਇਤਿਹਾਸ 'ਤੇ ਸਰਸਰੀ ਝਾਤ ਮਾਰਿਆਂ ਹੀ ਇਹ ਗੱਲ ਉੱਘੜ ਆਉਂਦੀ ਹੈ ਕਿ ਭਾਰਤੀ ਕਮਿਊਨਿਸਟ ਪਾਰਟੀ (ਸੀ.ਪੀ.ਆਈ.) ਦੀ ਕੇਂਦਰੀ ਲੀਡਰਸ਼ਿੱਪ ਵੱਲੋਂ ਕਦੇ ਵੀ ਇਸ ਦਰੁਸਤ ਸਮਝ ਦੀ ਪੈਰਵਾਈ ਨਹੀਂ ਕੀਤੀ ਗਈ। ਇੱਥੋਂ ਤੱਕ ਕਿ ਜਦੋਂ 1946-51 ਦਰਮਿਆਨ ਤਿਲੰਗਾਨਾ ਦੇ ਕਿਸਾਨਾਂ ਵੱਲੋਂ ਹਥਿਆਰਬੰਦ ਘੋਲ ਦਾ ਬੀੜਾ ਚੁੱਕਿਆ ਗਿਆ ਤਾਂ ਸੀ.ਪੀ.ਆਈ. ਦੀ ਮੌਕਾਪ੍ਰਸਤ ਕੇਂਦਰੀ ਲੀਡਰਸ਼ਿੱਪ ਵੱਲੋਂ ਪਹਿਲਾਂ ਇਸਦਾ ਵਿਰੋਧ ਕੀਤਾ ਗਿਆ ਅਤੇ ਆਖਰ 1951 ਵਿੱਚ ਇਸ ਨੂੰ ਵਾਪਸ ਲੈਂਦਿਆਂ, ਇਸਦਾ ਭੋਗ ਪਾ ਦਿੱਤਾ ਗਿਆ। ਪਰ ਇਸ ਤੋਂ ਵੱਡੀ ਅਫਸੋਸ ਦੀ ਗੱਲ ਇਹ ਹੈ ਕਿ ਸੱਜੀ ਮੌਕਾਪ੍ਰਸਤ ਕੇਂਦਰੀ ਲੀਡਰਸ਼ਿੱਪ ਵੱਲੋਂ ਤਿਲੰਗਾਨਾ ਹਥਿਆਰਬੰਦ ਘੋਲ ਨਾਲ ਕੀਤੀ ਗਈ ਇਸ ਗ਼ਦਾਰੀ ਦੇ ਵਿਰੋਧ ਵਿੱਚ ਪਾਰਟੀ ਸਫਾਂ, ਵਿਸ਼ੇਸ਼ ਕਰਕੇ ਤਿਲੰਗਾਨਾ ਵਿਚਲੀਆਂ ਸਫਾਂ ਵਿੱਚ ਰੋਸ ਸੁਰਾਂ ਤਾਂ ਉੱਠੀਆਂ, ਪਰ ਘੋਲ ਦੀਆਂ ਮੂਹਰਲੀਆਂ ਸਫਾਂ ਵਿੱਚ ਵਿਚਰਦੇ ਕਿਸੇ ਵੀ ਹਿੱਸੇ, ਵਿਸ਼ੇਸ਼ ਕਰਕੇ ਤਿਲੰਗਾਨਾ ਹਥਿਆਰਬੰਦ ਘੋਲ ਦੀ ਅਲੰਬਰਦਾਰੀ ਦੇ ਸਭ ਤੋਂ ਵੱਡੇ ਗੁਰਜਧਾਰੀ ਹੋਣ ਦਾ ਦਾਅਵਾ ਕਰਦੇ ਡੀ.ਵੀ. ਰਾਓ ਅਤੇ ਤ੍ਰਿਮਲਾ ਨਾਗੀ ਰੈਡੀ ਵਰਗਿਆਂ ਵੱਲੋਂ ਵੀ ਸੱਜੀ ਮੌਕਾਪ੍ਰਸਤ ਪਟੜੀ ਚੜ•ੀ ਕੇਂਦਰੀ ਲੀਡਰਸ਼ਿੱਪ ਦੀ ਇਸ ਗ਼ਦਾਰੀ ਦਾ ਨਾ ਹੀ ਡਟਵਾਂ ਵਿਰੋਧ ਕੀਤਾ ਗਿਆ ਅਤੇ ਨਾ ਹੀ ਪਾਰਟੀ ਅੰਦਰੂਨੀ ਘੋਲ ਦਾ ਮੁੱਦਾ ਬਣਾਉਂਦਿਆਂ, ਸੱਜੀ ਮੌਕਾਪ੍ਰਸਤ ਲੀਹ ਨਾਲੋਂ ਕੋਈ ਸਪਸ਼ੱਟ ਤੇ ਨਿੱਤਰਵਾਂ ਅਤੇ ਬੁਨਿਆਦੀ ਨਿਖੇੜਾ ਕਰਕੇ ਚੱਲਣ ਦਾ ਜੁਰਅੱਤਮੰਦ ਰੁਖ ਅਖਤਿਆਰ ਕੀਤਾ ਗਿਆ। 
1951 ਤੋਂ ਬਾਅਦ ਅਜੈ ਘੋਸ਼ ਦੀ ਜਨਰਲ ਸਕੱਤਰਸ਼ਿੱਪ ਹੇਠਲੀ ਕੇਂਦਰੀ ਲੀਡਰਸ਼ਿੱਪ ਵੱਲੋਂ ਐਲਾਨੀਆਂ ਸੱਜੀ ਮੌਕਾਪ੍ਰਸਤ ਲੀਹ ਅਤੇ ਸੋਧਵਾਦ ਦਾ ਰਾਹ ਅਖਤਿਆਰ ਕਰ ਲਿਆ ਗਿਆ। ਭਾਰਤੀ ਇਨਕਲਾਬ ਤੋਂ ਭਗੌੜੀ ਇਸ ਸੋਧਵਾਦੀ ਜੁੰਡਲੀ ਵੱਲੋਂ ਮੁਲਕ ਦੀ ਨਕਲੀ ਆਜ਼ਾਦੀ ਨੂੰ ਖਰੀ ਆਜ਼ਾਦੀ ਅਤੇ ਇਸਦੀ ਨਕਲੀ ਜਮਹੂਰੀਅਤ ਨੂੰ ਅਸਲੀ ਜਮਹੂਰੀਅਤ ਐਲਾਨਦਿਆਂ, ਪਾਰਲੀਮਾਨੀ ਸਿਆਸੀ ਰਾਹ ਅਖਤਿਆਰ ਕਰ ਲਿਆ ਗਿਆ। ਇਉਂ, ਆਪਣੀ ਅਗਵਾਈ ਹੇਠ ਸਮੁੱਚੀ ਜਨਤਕ ਲਹਿਰ ਸਮੇਤ ਕਿਸਾਨ ਲਹਿਰ ਨੂੰ ਆਰਥਿਕਵਾਦ, ਸੁਧਾਰਵਾਦ ਅਤੇ ਕਾਨੂੰਨਵਾਦ ਦੀ ਪਟੜੀ ਚਾੜ• ਦਿੱਤਾ ਗਿਆ। ਪਾਰਟੀ ਸਫਾਂ ਅਤੇ ਲੋਕਾਂ ਦੇ ਅੱਖੀਂ ਘੱਟਾ ਪਾਉਣ ਲਈ ਇਸ ਆਰਥਿਕਵਾਦ ਅਤੇ ਕਾਨੂੰਨਵਾਦ ਨੂੰ ਖਾੜਕੂਵਾਦ ਦਾ ਮੁਲੰਮਾ ਚਾੜ• ਕੇ ਵਰਤਾਉਣ ਲਈ ਜ਼ੋਰ ਲਾਇਆ ਗਿਆ। 
ਇੱਕ ਹੱਥ- ਅਖੌਤੀ ਖੱਬੀ ਲਫਾਜ਼ੀ ਦੀ ਹੋਕਰੇਬਾਜ਼ੀ ਨੂੰ ਜਾਰੀ ਰੱਖਿਆ ਗਿਆ ਅਤੇ ਦੂਜੇ ਹੱਥ— ਖੁੱਲ•ੀ ਅਤੇ ਕਾਨੂੰਨੀ ਕਿਸਾਨ ਜਥੇਬੰਦੀ (ਕੁੱਲ ਹਿੰਦ ਕਿਸਾਨ ਸਭਾ) ਦੀ ਅਗਵਾਈ ਹੇਠ ਨਾ ਸਿਰਫ ਪੁਰਅਮਨ ਘੋਲ ਸ਼ਕਲਾਂ ਰਾਹੀਂ ਅੰਸ਼ਿਕ ਮੰਗਾਂ/ਮਸਲਿਆਂ, ਸਗੋਂ ਜਾਗੀਰਦਾਰਾਂ ਅਤੇ ਸਰਕਾਰੀ ਕਬਜ਼ੇ ਹੇਠਲੀ ਜ਼ਮੀਨ ਨੂੰ ਵੰਡਣ ਦੀ ਮੰਗ ਲਈ ਕਿਸਾਨਾਂ ਨੂੰ ਉਭਾਰਨ ਦਾ ਦੰਭੀ ਅਮਲ ਜਾਰੀ ਰੱਖਿਆ ਗਿਆ। ਕਿਸਾਨ ਜਥੇਬੰਦੀ ਦੀ ਅਗਵਾਈ ਹੇਠ ਵਾਧੂ ਪਈਆਂ ਸਰਕਾਰੀ ਜ਼ਮੀਨਾਂ (ਬੇਟ ਦੇ ਇਲਾਕੇ ਅੰਦਰ) ਅਤੇ ਜਾਗੀਰਦਾਰਾਂ ਦੀਆਂ ਜ਼ਮੀਨਾਂ  'ਤੇ ਕਬਜ਼ੇ ਲਈ ਜਥਾ ਮਾਰਚ ਕਰਨ ਦਾ ਖੇਖਣ ਜਾਰੀ ਰੱਖਿਆ ਗਿਆ। 1959 'ਚ ਪੰਜਾਬ ਦੀ ਕੈਰੋਂ ਹਕੂਮਤ ਵੱਲੋਂ ਲਾਏ ਖੁਸ਼ਹੈਸੀਅਤ ਟੈਕਸ ਖਿਲਾਫ ਜੇਲ• ਭਰੋ ਮੋਰਚਾ ਲਾਇਆ ਗਿਆ, ਜਿਹੜਾ ਪੰਜਾਹਵਿਆਂ ਤੋਂ ਲੈ ਕੇ ਅੱਜ ਤੱਕ ਦੇ ਪੰਜਾਬ ਦੇ ਕਿਸਾਨ ਘੋਲਾਂ ਦੇ ਇਤਿਹਾਸ ਦਾ ਸਭ ਤੋਂ ਵੱਡਾ ਅਤੇ ਪ੍ਰਭਾਵਸ਼ਾਲੀ ਘੋਲ ਹੋ ਨਿੱਬੜਿਆ ਹੈ। ਇਉਂ, ਪਹਿਲਾਂ ਸੀ.ਪੀ.ਆਈ. ਦੀ ਲੀਡਰਸ਼ਿੱਪ ਵੱਲੋਂ ਅਤੇ 1964 ਵਿੱਚ ਸੀ.ਪੀ.ਆਈ. (ਐਮ.)  ਦੀ ਲੀਡਰਸ਼ਿੱਪ ਵੱਲੋਂ ਰਵਾਇਤੀ ਆਰਥਿਕਵਾਦੀ, ਸੁਧਾਰਵਾਦੀ ਅਤੇ ਕਾਨੂੰਨਵਾਦੀ ਕਿਸਾਨ ਘੋਲਾਂ ਦਾ ਸਿਲਸਿਲਾ ਜਾਰੀ ਰੱਖਿਆ ਗਿਆ ਅਤੇ ਇਸ 'ਤੇ ਖਾੜਕੂ ਪਾਹ ਚਾੜ• ਕੇ ਪੇਸ਼ ਕਰਨ ਦਾ ਗੁਮਰਾਹੀ ਅਮਲ ਚਲਾਇਆ ਗਿਆ। ਕਿਸਾਨ ਲਹਿਰ ਨੂੰ ਲੀਹੋਂ ਲਾਹੁਣ ਦਾ ਸਿਰਾ ਇਹ ਸੀ ਕਿ ਦੋਵਾਂ ਸੀ.ਪੀ.ਆਈ. ਅਤੇ ਫਿਰ ਸੀ.ਪੀ.ਆਈ.(ਐਮ.) ਵੱਲੋਂ ਕਿਸਾਨ ਜਥੇਬੰਦੀਆਂ ਨੂੰ ਐਲਾਨੀਆਂ ਪਾਰਟੀ ਨਾਲ ਟੋਚਨ ਕਰਦਿਆਂ, ਇਹਨਾਂ ਨੂੰ ਆਪਣੀਆਂ ਮੌਕਾਪ੍ਰਸਤ ਵੋਟ ਸਿਆਸਤ ਦੇ ਸੰਦ ਵਜੋਂ ਢਾਲਣ ਦੀ ਸੇਧ ਅਖਤਿਆਰ ਕੀਤੀ ਗਈ। ਇਉਂ, ਇਹ ਇਹਨਾਂ ਦੋਵਾਂ ਸੋਧਵਾਦੀ ਟੋਲਿਆਂ ਵੱਲੋਂ ਪੰਜਾਬ ਦੀ ਕਿਸਾਨੀ ਨਾਲ ਧਰੋਹ ਕਮਾਉਂਦਿਆਂ ਸੂਬੇ ਦੀ ਕਿਸਾਨ ਲਹਿਰ ਦਾ ਭੋਗ ਪਾਉਣ ਦਾ ਅਮਲ ਚਲਾਇਆ ਗਿਆ। 
ਇਹ ਮਈ 1967 ਵਿੱਚ ਪੱਛਮੀ ਬੰਗਾਲ ਵਿੱਚ ਉੱਠੀ ਨਕਸਲਬਾੜੀ ਹਥਿਆਰਬੰਦ ਘੋਲ ਦੀ ਲਾਟ ਹੀ ਸੀ, ਜਿਸ ਵੱਲੋਂ ਸੋਧਵਾਦ ਅਤੇ ਨਵਸੋਧਵਾਦ ਦੇ ਮਨਹੂਸ ਮੁਖੌਟਿਆਂ ਨੂੰ ਭਰਿਆੜ ਕਰਦਿਆਂ, ਭਾਰਤੀ ਇਨਕਲਾਬ ਦਾ ਰਾਹ ਰੁਸ਼ਨਾਇਆ ਗਿਆ  ਅਤੇ ਸੋਧ-ਨਵਸੋਧਵਾਦ ਨਾਲੋਂ ਬੁਨਿਆਦੀ ਨਿਖੇੜੇ ਦੀ ਲਕੀਰ ਖਿੱਚਦਿਆਂ, ਇਹ ਉਭਾਰਿਆ ਗਿਆ ਕਿ ਮਾਰਕਸਵਾਦ-ਲੈਨਿਨਵਾਦ-ਮਾਓ ਵਿਚਾਰਧਾਰਾ ਹੀ ਅੱਜ ਦਾ ਮਾਰਕਸਵਾਦ ਹੈ ਅਤੇ ਕੌਮਾਂਤਰੀ ਕਮਿਊਨਿਸਟ ਲਹਿਰ ਦੀ ਰਾਹ-ਦਸੇਰਾ ਵਿਚਾਰਧਾਰਾ ਹੈ। ਇੱਕ ਅਰਧ-ਬਸਤੀਵਾਦੀ ਅਰਧ-ਜਾਗੀਰੂ ਮੁਲਕ ਹੋਣ ਕਰਕੇ ਭਾਰਤ ਦਾ ਇਨਕਲਾਬ ਨਵ-ਜਮਹੂਰੀ ਇਨਕਲਾਬ ਹੋਵੇਗਾ ਅਤੇ ਇਸਨੂੰ ਲਮਕਵੇਂ ਲੋਕ-ਯੁੱਧ ਦੇ ਰਾਹ 'ਤੇ ਚੱਲਦਿਆਂ ਨੇਪਰੇ ਚਾੜਿ•ਆ ਜਾਵੇਗਾ। ਇਉਂ, ਫਿਰ ਲਮਕਵੇਂ ਲੋਕ ਯੁੱਧ ਯਾਨੀ ''ਤੱਤ ਰੂਪ ਵਿੱਚ ਕਿਸਾਨ ਜੰਗ'' ਦਾ ਸੁਆਲ ਭਾਰਤੀ ਇਨਕਲਾਬ ਦੇ ''ਕੇਂਦਰੀ ਕਾਰਜ'' ਵਜੋਂ ਉਭਰਿਆ ਅਤੇ ਸਥਾਪਤ ਹੋਇਆ। ਨਕਸਲਬਾੜੀ ਕੈਂਪ (ਕਮਿਊਨਿਸਟ ਇਨਕਲਾਬੀਆਂ) ਦੇ ਵੱਡੇ ਹਿੱਸੇ ਵਿੱਚ ਇਸ ਦਰੁਸਤ ਸਮਝ ਦਾ ਸੰਚਾਰ ਹੋਇਆ ਕਿ ਕਿਸਾਨ ਘੋਲ ਦੀ ਪ੍ਰਮੁੱਖ ਸ਼ਕਲ ਹਥਿਆਰਬੰਦ ਹੋਵੇਗੀ ਅਤੇ ਜਥੇਬੰਦੀ ਦੀ ਪ੍ਰਮੁੱਖ ਸ਼ਕਲ ਕਿਸਾਨਾਂ ਦੀ ਹਥਿਆਰਬੰਦ ਫੌਜ ਹੋਵੇਗੀ। ਇਸਦਾ ਤਾਣਾ-ਬਾਣਾ ਅਤੇ ਕਾਰਵਿਹਾਰ ਅਤੇ ਅਮਲਦਾਰੀ (ਅਪਰੇਸ਼ਨ) ਗੈਰਕਾਨੂੰਨੀ ਅਤੇ ਗੁਪਤ ਹੋਵੇਗਾ। ਕਿਸਾਨ ਸਰਗਰਮੀ ਅਤੇ ਜਥੇਬੰਦੀ ਦੀਆਂ ਕਾਨੂੰਨੀ, ਖੁੱਲ•ੀਆਂ ਅਤੇ ਪੁਰਅਮਨ ਸ਼ਕਲਾਂ ਦੀ ਵੀ ਵਰਤੋਂ ਕੀਤੀ ਜਾਵੇਗੀ। ਪਰ ਇਹਨਾਂ ਦਾ ਰੋਲ ਸੀਮਤ ਹੋਵੇਗਾ ਅਤੇ ਦੋਮ ਦਰਜ਼ੇ ਦਾ ਹੋਵੇਗਾ। ਹਥਿਆਰਬੰਦ ਘੋਲ ਦੀ ਸ਼ੁਰੂਆਤ ਤੋਂ ਪਹਿਲਾਂ ਕਿਸਾਨ ਘੋਲ ਅਤੇ ਜਥੇਬੰਦੀ ਦੀਆਂ ਕਾਨੂੰਨੀ ਅਤੇ ਪੁਰਅਮਨ ਸ਼ਕਲਾਂ ਦੀ ਹਥਿਆਰਬੰਦ ਘੋਲ ਦੀ ਤਿਆਰੀ ਲਈ ਵਰਤੋਂ ਕੀਤੀ ਜਾਵੇਗੀ ਅਤੇ ਹਥਿਆਰਬੰਦ ਘੋਲ ਸ਼ੁਰੂ ਹੋਣ ਤੋਂ ਬਾਅਦ ਸਿੱਧੇ/ਅਸਿੱਧੇ ਇਸਦੀ ਹਮਾਇਤ ਵਿੱਚ ਭੁਗਤਾਇਆ ਜਾਵੇਗਾ। ਇੱਥੇ ਨੋਟ ਕਰਨ ਵਾਲੀ ਗੱਲ ਇਹ ਹੈ ਕਿ ਕਿਸਾਨ ਹਥਿਆਰਬੰਦ ਘੋਲ ਦੀ ਤਿਆਰੀ ਦੇ ਅਮਲ ਵਿੱਚ ਖੁੱਲ•ੀ ਕਾਨੂੰਨੀ ਅਤੇ ਪੁਰਅਮਨ ਕਿਸਾਨ ਸੰਘਰਸ਼ ਸਰਗਰਮੀ ਅਤੇ ਇਸ ਨੂੰ ਚਲਾ ਰਹੀ ਜਥੇਬੰਦੀ ਦਾ ਰੋਲ ਮਹਿਜ਼ ਸਹਾਈ ਹੋਵੇਗਾ ਅਤੇ ਪਹਿਲਾਂ ਹਥਿਆਰਬੰਦ ਘੋਲ ਦੀ ਤਿਆਰੀ ਦੇ ਅਮਲ ਵਿੱਚ ਸਹਾਈ ਹੋਣਾ ਅਤੇ ਬਾਅਦ ਵਿੱਚ ਕਿਸਾਨ ਗੁਰੀਲਾ ਤਾਕਤਾਂ ਨੂੰ ਸੰਭਵ ਓਟ (ਕਵਰ) ਮੁਹੱਈਆ ਕਰਨਾ ਅਤੇ ਸਿੱਧੀ-ਅਸਿੱਧੀ ਤਾਲਮੇਲਵੀਂਂ ਹਮਾਇਤ ਮੁਹੱਈਆ ਕਰਨਾ ਹੋਵੇਗਾ। 
ਪਰ ਨਕਸਲਬਾੜੀ ਕੈਂਪ ਵਿੱਚ ਸੀ.ਪੀ.ਆਈ.(ਐਮ.ਐਲ.) ਦੀ ਅਗਵਾਈ ਹੇਠ ਜਿੱਥੇ ਹਥਿਆਰਬੰਦ ਘੋਲ ਨੂੰ ਘੋਲ ਦੀ ਇੱਕੋ ਇੱਕ ਸ਼ਕਲ ਸਮਝਣ ਅਤੇ ਘੋਲ ਤੇ ਜਥੇਬੰਦੀ ਦੀਆਂ ਪੁਰਅਮਨ, ਕਾਨੂੰਨੀ ਅਤੇ ਖੁੱਲ•ੀਆਂ ਸ਼ਕਲਾਂ ਨੂੰ ਮੁੱਢੋਂ ਰੱਦ ਕਰਨ ਦੀ ਖੱਬੀ ਮਾਰਅਰਕੇਬਾਜ਼ ਸਮਝ ਨੇ ਸਿਰ ਚੁੱਕਿਆ, ਉੱਥੇ ਡੀ.ਵੀ. ਰਾਓ-ਨਾਗੀ ਰੈਡੀ ਧਿਰ ਅੰਦਰ ਜਨਤਕ ਜਥੇਬੰਦੀਆਂ ਅਤੇ ਜਨਤਕ ਘੋਲਾਂ ਦੇ ਰੋਲ ਦਾ ਕਤੱਈਕਰਨ ਅਤੇ ਇਹਨਾਂ ਨੂੰ ਆਪਣੀ ਕੁੱਲ ਸਰਗਰਮੀ ਦਾ ਧੁਰਾ ਬਣਾਉਣ ਦੀ ਸੱਜੀ ਮੌਕਾਪ੍ਰਸਤ ਸਮਝ ਨੇ ਸਿਰ ਚੁੱਕ ਲਿਆ। ਇਸ ਧਿਰ ਦੀ ਸਮਝ ਮੁਤਾਬਕ ਹੋਰਨਾਂ ਤਬਕਿਆਂ/ਜਮਾਤਾਂ ਦੀਆਂ ਜਥੇਬੰਦੀਆਂ ਵਾਂਗ ਇੱਕ ਖੁੱਲ•ੀ ਅਤੇ ਕਾਨੂੰਨੀ ਕਿਸਾਨ ਜਥੇਬੰਦੀ ਉਸਾਰੀ ਜਾਵੇਗੀ ਜਿਹੜੀ ਖੁੱਲ•ੇ, ਕਾਨੂੰਨੀ ਅਤੇ ਪੁਰਅਮਨ ਘੋਲ ਸਰਗਰਮੀਆਂ ਦਾ ਸਿਲਸਿਲਾ ਤੋਰੇਗੀ। ਇਹ ਕਿਸਾਨ ਜਥੇਬੰਦੀ ਇਨਕਲਾਬੀ ਜ਼ਰੱਈ ਲਹਿਰ ਖੜ•ੀ ਕਰਨ ਯਾਨੀ ਹਥਿਆਰਬੰਦ ਜ਼ਰੱਈ ਲਹਿਰ/ਕਿਸਾਨ ਜੰਗ ਤੇ ਫੌਜ ਉਸਾਰਨ ਦਾ ਸਾਧਨ ਬਣੇਗੀ। ਇਸ ਕਿਸਾਨ ਜਥੇਬੰਦੀ ਦੀ ਅਗਵਾਈ ਹੇਠ ਕਿਸਾਨਾਂ ਦੀ ਇਨਕਲਾਬੀ ਚੇਤਨਾ ਨੂੰ ਉੱਚਾ ਚੁੱਕਿਆ ਜਾਵੇਗਾ। ਚੇਤਨਾ ਦਾ ਪਸਾਰਾ ਤੇ ਤਰੱਕੀ ਹੋਣ ਨਾਲ ਘੋਲ ਵੀ ਉਚੇਰੀਆਂ ਸ਼ਕਲਾਂ ਵੱਲ ਵਧਣਗੇ। ਜਾਗੀਰਦਾਰਾਂ ਦੇ ਗੁੰਡਾ ਗਰੋਹਾਂ ਅਤੇ ਪੁਲਸ ਦੇ ਹਮਲਿਆਂ ਦਾ ਟਾਕਰਾ ਕਰਨ ਅਤੇ ਕਿਸਾਨ ਆਗੂਆਂ ਤੇ ਜਥੇਬੰਦੀ ਦੀ ਰਾਖੀ ਲਈ ਕਿਸਾਨ ਜਥੇਬੰਦੀ ਵੱਲੋਂ ਆਪਣੀ ਇੱਕ ਵਾਲੰਟੀਅਰ ਤਾਕਤ ਉਸਾਰੀ ਜਾਵੇਗੀ। ਘੋਲ ਕਦਮ-ਬ-ਕਦਮ ਅੰਸ਼ਿਕ ਮੰਗਾਂ/ਮਸਲਿਆਂ ਤੋਂ ਬੁਨਿਆਦੀ (ਜਾਗੀਰਦਾਰਾਂ ਦੀਆਂ ਜ਼ਮੀਨਾਂ ਖੋਹਣ ਤੇ ਵੰਡਣ) ਕਾਰਜ ਪੂਰਾ ਕਰਨ ਵੱਲ ਵਧਣਗੇ। ਜਦੋਂ ਜਾਗੀਰਦਾਰਾਂ ਦੀਆਂ ਜ਼ਮੀਨਾਂ 'ਤੇ ਕਬਜ਼ਾ ਕਰ ਲਿਆ ਗਿਆ ਤਾਂ ਰਾਜ ਦੀ ਪੁਲਸ ਅਤੇ ਹੋਰ ਹਥਿਆਰਬੰਦ ਸ਼ਕਤੀਆਂ ਹਰਕਤ ਵਿੱਚ ਆਉਣਗੀਆਂ। ਰਾਜ ਦੀਆਂ ਹਥਿਆਰਬੰਦ ਸ਼ਕਤੀਆਂ ਦਾ ਟਾਕਰਾ ਕਰਨ ਲਈ ਕਿਸਾਨ ਜਥੇਬੰਦੀ ਵੱਲੋਂ ਉਸਾਰੀ ਵਾਲੰਟੀਅਰ ਟੋਲੀਆਂ ਨੂੰ ਇੱਕਦਮ ਗੁਰੀਲਾ ਟੋਲੀਆਂ ਵਿੱਚ ਤਬਦੀਲ ਕਰਦਿਆਂ, ਖੋਹੀ ਜ਼ਮੀਨ ਦੀ ਰਾਖੀ ਲਈ ਗੁਰੀਲਾ ਜੰਗ ਦਾ ਬਿਗਲ ਵਜਾ ਦਿੱਤਾ ਜਾਵੇਗਾ। 
ਇਹ ਆਰਥਿਕਵਾਦੀ-ਸੁਧਾਰਵਾਦੀ ਸਮਝ ਜਾਗੀਰਦਾਰਾਂ ਤੋਂ ਜਬਰੀ ਜ਼ਮੀਨਾਂ ਖੋਹਣ ਅਤੇ ਕਿਸਾਨਾਂ ਵਿੱਚ ਵੰਡਣ ਦੇ ਸੁਆਲ ਨੂੰ ਰਾਜ ਦੀ ਹਿੰਸਕ ਤਾਕਤ ਨਾਲੋਂ ਤੋੜ ਕੇ ਪੇਸ਼ ਕਰਦੀ ਹੈ। ਇਸ ਮੁਤਾਬਕ ਖੁੱਲ•ੀ ਕਿਸਾਨ ਜਨਤਕ ਜਥੇਬੰਦੀ ਦੀ ਅਗਵਾਈ ਵਿੱਚ ਕਿਸਾਨਾਂ ਨੂੰ ਜਥੇਬੰਦ ਕਰਦਿਆਂ ਅਤੇ ਸ਼ਾਂਤਮਈ ਘੋਲਾਂ ਦਾ ਸਿਲਸਿਲਾ ਚਲਾਉਂਦਿਆਂ, ਘੋਲਾਂ ਨੂੰ ਅੰਸ਼ਿਕ ਮੰਗਾਂ ਤੋਂ ਬੁਨਿਆਦੀ ਮੰਗਾਂ ਮੰਨਵਾਉਣ ਦੀ ਸੇਧ ਵਿੱਚ ਵਧਾਉਂਦਿਆਂ, ਕਿਸਾਨਾਂ ਨੂੰ ਜਾਗੀਰਦਾਰਾਂ ਦੀ ਜ਼ਮੀਨ 'ਤੇ ਕਬਜ਼ੇ ਲਈ ਤਿਆਰ-ਬਰ-ਤਿਆਰ ਕਰ ਲਿਆ ਜਾਵੇਗਾ। ਇਸ ਸਾਰੇ ਅਮਲ ਦੌਰਾਨ ਖੂੰਖਾਰ ਆਪਾਸ਼ਾਹ ਰਾਜ ਬੜਾ ਸੀਲ ਰਾਜ ਬਣ ਕੇ ਪਾਸੇ ਖੜਿ•ਆਂ ਸਭ ਕੁੱਝ ਦੇਖਦਾ ਰਹੇਗਾ ਅਤੇ ਜਦੋਂ ਕਿਸਾਨ ਕਾਫਲਿਆਂ ਵੱਲੋਂ ਜਾਗੀਰਦਾਰਾਂ ਦੀਆਂ ਜ਼ਮੀਨਾਂ 'ਤੇ ਕਬਜ਼ਾ ਕਰ ਲਿਆ ਗਿਆ ਤਾਂ ਉਸ ਤੋਂ ਬਾਅਦ ਇਹ ਰਾਜ ਸੁੱਤਾ ਜਾਗੇਗਾ ਅਤੇ ਹਰਕਤ ਵਿੱਚ ਆਵੇਗਾ। ਇਸ ਮੁਤਾਬਕ ਕਿਸਾਨਾਂ ਵੱਲੋਂ ਸਮੂਹਿਕ ਰੂਪ ਵਿੱਚ ਕਬਜ਼ੇ ਦਾ ਅਮਲ ਵਿੱਢਣ ਤੋਂ ਬਾਅਦ ਹੀ ਰਾਜ ਨਾਲ ਹਥਿਆਰਬੰਦ ਭੇੜ ਸ਼ੁਰੂ ਹੋਵੇਗਾ। 
ਇਉਂ, ਇਹ ਸੱਜੀ ਮੌਕਾਪ੍ਰਸਤ ਸਮਝ ਇਸ ਸਹੀ ਸਮਝ ਨੂੰ ਸਿਰ ਪਰਨੇ ਖੜ•ਾ ਕਰਦੀ ਹੈ ਕਿ ਜਾਗੀਰਦਾਰਾਂ ਦੀ ਜ਼ਮੀਨ 'ਤੇ ਜਬਰੀ ਕਬਜ਼ਾ ਕਰਨ ਅਤੇ ਕਿਸਾਨਾਂ ਵਿੱਚ ਵੰਡਣ ਦਾ ਸੁਆਲ ਰਾਜ ਦੀ ਹਿੰਸਕ ਤਾਕਤ ਨੂੰ ਤਹਿਸ਼-ਨਹਿਸ਼ ਕਰਨ ਦਾ ਸੁਆਲ ਹੈ। ਰਾਜ ਦੀ ਤਾਕਤ ਨੂੰ ਤਹਿਸ਼-ਨਹਿਸ਼ ਕੀਤੇ ਬਿਨਾ ਅਤੇ ਮੁਤਬਾਦਲ ਇਨਕਲਾਬੀ ਲੋਕ ਤਾਕਤ ਦੀ ਉਸਾਰੀ ਕੀਤੇ ਬਿਨਾ ਜਾਗੀਰਦਾਰਾਂ ਦੀਆਂ ਜ਼ਮੀਨਾਂ ਖੋਹਣ ਅਤੇ ਵੰਡਣ ਦੀ ਗੱਲ ਤਾਂ ਦੂਰ ਰਹੀ, ਇਹ ਖੂੰਖਾਰ ਰਾਜ ਦੀਆਂ ਹਥਿਆਰਬੰਦ ਤਾਕਤਾਂ ਕਿਸੇ ਕਿਸਾਨ ਜਥੇਬੰਦੀ ਦੀ ਅਗਵਾਈ ਹੇਠ ਇਕੱਠੀ ਹੋਈ ਵੱਡੀ ਤੋਂ ਵੱਡੀ ਕਿਸਾਨ ਤਾਕਤ ਨੂੰ ਵੀ ਜ਼ਮੀਨ ਦੇ ਨੇੜੇ ਤੱਕ ਨਹੀਂ ਫਟਕਣ ਦੇਵੇਗਾ। ਜਿਥੇ ਕਿਤੇ ਵੀ ਖੁੱਲ•ੀ ਕਿਸਾਨ ਜਨਤਕ ਜਥੇਬੰਦੀ ਦੀ ਅਗਵਾਈ ਹੇਠ ਅਜਿਹੀ ਨਿਹਫਲ ਕੋਸ਼ਿਸ਼ ਕੀਤੀ ਗਈ ਹੈ, ਵਹਿਸ਼ੀ ਰਾਜ ਦੀਆਂ ਆਦਮ-ਬੋਅ ਕਰਦੀਆਂ ਹਥਿਆਰਬੰਦ ਤਾਕਤਾਂ ਵੱਲੋਂ ਨਾ ਸਿਰਫ ਇਸ ਨੂੰ ਬੁਰੀ ਤਰ•ਾਂ ਕੁਚਲ ਦਿੱਤਾ ਗਿਆ ਹੈ, ਸਗੋਂ  ਇਸਦਾ ਨਤੀਜਾ ਕਿਸਾਨ ਲਹਿਰ ਦੇ ਖਿੰਡਾਅ, ਲੜਾਕੂ ਕਿਸਾਨ ਕਾਰਕੁੰਨਾਂ ਦੇ ਜਬਰ-ਤਸ਼ੱਦਦ ਰਾਹੀਂ ਸਫਾਏ ਅਤੇ ਨਿਰਾਸ਼ਾ ਅਤੇ ਨਿਤਾਣੇਪੁਣ ਦੇ ਪਸਾਰੇ ਵਿੱਚ ਨਿਕਲਿਆ ਹੈ। ਸਾਫ ਹੈ— ਇੱਕ ਖੁੱਲ•ੀ ਜਨਤਕ ਜਥੇਬੰਦੀ ਦਾ ਥੜ•ਾ ਨੱਕੋ-ਨੱਕ ਹਥਿਆਰਬੰਦ ਰਾਜ ਦਾ ਟਾਕਰਾ ਕਰਨ ਦਾ ਹਥਿਆਰ ਨਹੀਂ ਬਣ ਸਕਦਾ ਅਤੇ ਨਾ ਹੀ ਇਸ ਥੜ•ੇ ਰਾਹੀਂ ਜਾਂ ਇਸ ਥੜ•ੇ ਦੇ ਘੇਰੇ ਵਿੱਚ ਵਿਚਰਦਿਆਂ ਕਿਸੇ ਅਜਿਹੀ ਹਥਿਆਰਬੰਦ ਗੁਰੀਲਾ ਤਾਕਤ ਦੀ ਪਰਵਿਰਸ਼ ਕੀਤੀ ਜਾ ਸਕਦੀ ਹੈ, ਜਿਹੜੀ ਇਸ ਜਾਬਰ ਰਾਜ ਨਾਲ ਹਥਿਆਰਬੰਦ ਗੁਰੀਲਾ ਭੇੜ ਵਿੱਚ ਪੈਣ ਲਈ ਲੋੜੀਂਦੀਆਂ ਫੌਜੀ-ਸਿਆਸੀ ਪੇਸ਼ਾਵਰਾਨਾ ਮਾਨਸਿਕ ਤਿਆਰੀ, ਸਿਖਲਾਈ, ਢਲਾਈ ਅਤੇ ਗੁਪਤ ਕਾਰਵਿਹਾਰ ਅਤੇ ਗਤੀਵਿਧੀਆਂ ਦੀ ਮੁਹਾਰਤ ਵਰਗੀਆਂ ਘੱਟੋ ਘੱਟ ਲਾਜ਼ਮੀ ਸਿਫਤਾਂ ਦੀ ਮਾਲਕ ਹੋਵੇ। 
ਕਿਸਾਨ ਜਥੇਬੰਦੀ ਅਤੇ ਲਹਿਰ ਦੀ ਜਾਗੀਰਦਾਰਾਂ ਦੇ ਗੁੰਡਾ ਹਮਲਿਆਂ ਆਦਿ ਤੋਂ ਰਾਖੀ ਲਈ ਜਿਵੇਂ ਮਨਇੱਛਤ  ਵਾਲੰਟੀਅਰ ਤਾਕਤ ਦੀ ਉਸਾਰੀ ਕਰਨ ਅਤੇ ਜ਼ਮੀਨਾਂ 'ਤੇ ਕਬਜ਼ੇ ਨੂੰ ਕਾਇਮ ਰੱਖਣ ਲਈ ਰਾਜ ਦੀਆਂ ਹਥਿਆਰਬੰਦ ਤਾਕਤਾਂ ਖਿਲਾਫ ਗੁਰੀਲਾ ਤਾਕਤ ਵਿੱਚ ਪਲਟਣ ਦੀ ਗੱਲ ਇਹ ਸੁਧਾਰਵਾਦੀ ਸਮਝ ਕਰਦੀ ਹੈ, ਇਹ ਡੀ.ਵੀ.ਰਾਓ-ਨਾਗੀ ਰੈਡੀ ਮਾਰਕਾ ਸੱਜਾ ਸੋਧਵਾਦੀ ਤਰਕ ਹੈ, ਜਿਹੜਾ ਭਰਮਾਊ ਅਤੇ ਗੁਮਰਾਹਕੁੰਨ ਹੈ। ਇਸ ਰਾਜ ਖਿਲਾਫ ਗੁਰੀਲਾ ਲੜਾਈ ਦਾ ਪਹਿਲਾ ਕਦਮ ਲੈਣ ਵਾਲੀ ਕਿਸੇ ਵੀ ਹਥਿਆਰਬੰਦ ਜਥੇਬੰਦੀ ਲਈ ਇਹ ਤਿੰਨ ਪੂਰਵ-ਸ਼ਰਤਾਂ ਪੂਰੀਆਂ ਕਰਨੀਆਂ ਲਾਜ਼ਮੀ ਹਨ: ਇੱਕ— ਇਹ ਜਥੇਬੰਦੀ ਪੂਰੀ ਤਰ•ਾਂ ਗੁਪਤ ਹੁੰਦੀ ਹੈ। ਇਸਦੀ ਹਥਿਆਰਬੰਦ ਸਿਖਿਆ-ਸਿਖਲਾਈ, ਗਤੀਵਿਧੀਆਂ ਅਤੇ ਕਾਰਵਿਹਾਰ ਪੂਰੀ ਤਰ•ਾਂ ਗੁਪਤ ਹੁੰਦਾ ਹੈ, ਦੂਜੀ— ਇਹ ਮੁੱਖ ਤੌਰ 'ਤੇ ਇੱਕ ਪੇਸ਼ੇਵਾਰਨਾ ਫੌਜੀ-ਸਿਆਸੀ ਤਾਕਤ ਹੁੰਦੀ ਹੈ ਯਾਨੀ ਗੁਰੀਲਾ ਜਥੇਬੰਦੀ ਦਾ ਮੁੱਖ ਹਿੱਸਾ ਫੌਜੀ ਅਤੇ ਸਿਆਸੀ ਸਰਗਰਮੀ ਨੂੰ ਪ੍ਰਣਾਇਆ ਹੁੰਦਾ ਹੈ: ਤੀਜਾ— ਇਸਦਾ ਕਾਰਜ ਦੁਸ਼ਮਣ ਦੀਆਂ ਹਥਿਆਰਬੰਦ ਤਾਕਤਾਂ ਦਾ ਸਫਾਇਆ ਹੋਣ ਕਰਕੇ ਇਹ (ਦਾਅਪੇਚਕ ਤੌਰ 'ਤੇ) ਹਮਲਾਵਰ ਜੰਗ ਲਈ ਤਿਆਰ ਕੀਤੀ ਜਾਂਦੀ ਹੈ। ਕੀ ਇੱਕ ਜਨਤਕ ਜਥੇਬੰਦੀ ਤੇ ਲਹਿਰ ਦੀ ਰਾਖੀ ਲਈ ਜਨਤਕ ਜਥੇਬੰਦੀ ਦੇ ਅੰਗ ਵਜੋਂ ਉਸਾਰੀ ਗਈ ਅਤੇ ਬਚਾਓਮੁਖੀ ਕੰਮਾਂ-ਕਾਰਾਂ ਲਈ ਤਾਇਨਾਤ ਤਾਕਤ ਇਹ ਸ਼ਰਤਾਂ ਪੂਰੀਆਂ ਕਰ ਸਕਦੀ ਹੈ? ਬਿਲਕੁੱਲ ਨਹੀਂ। ਇਹ ਵਾਲੰਟੀਅਰ ਤਾਕਤ ਰਾਜ ਦੀਆਂ ਖੁਫੀਆ ਏਜੰਸੀਆਂ ਮੂਹਰੇ ਪੂਰੀ ਤਰ•ਾਂ ਨਸ਼ਰ ਹੁੰਦੀ ਹੈ ਅਤੇ ਜਨਤਕ ਤੌਰ 'ਤੇ ਜਾਣੀ-ਪਛਾਣੀ ਹੁੰਦੀ ਹੈ। ਇਸਦਾ ਵਿਚਰਨ ਢੰਗ ਅਤੇ ਸਰਗਰਮੀਆਂ ਮੁੱਖ ਤੌਰ 'ਤੇ ਖੁੱਲ•ੀਆਂ ਹੋਣ ਕਰਕੇ ਇਹ ਗੁਪਤ ਕੰਮ-ਢੰਗ ਅਤੇ ਗਤੀਵਿਧੀਆਂ ਲਈ ਲੋੜੀਂਦੀ ਸਿੱਖਿਆ-ਸਿਖਲਾਈ ਅਤੇ ਢਲਾਈ ਤੋਂ ਲੱਗਭੱਗ ਸੱਖਣੀ ਹੁੰਦੀ ਹੈ। ਜਨਤਕ ਕੰਮਾਂ ਅਤੇ ਸਰਗਰਮੀਆਂ ਵਿੱਚ ਖੱਚਤ ਰਹਿਣ ਕਰਕੇ ਅਜਿਹੀ ਵਾਲੰਟੀਅਰ ਤਾਕਤ ਪੇਸ਼ੇਵਾਰਨਾ ਫੌਜੀ ਸਿਆਸੀ ਸਰਗਰਮੀ ਲਈ ਜੋਖਮ ਉਠਾਉਣ ਅਤੇ ਖਤਰਾ ਮੁੱਲ ਲੈਣ ਵਾਸਤੇ ਮਾਨਸਿਕ ਤੌਰ 'ਤੇ ਤਿਆਰੀ ਤੋਂ ਊਣੀ ਹੁੰਦੀ ਹੈ। ਇਸ ਨੂੰ ਜ਼ਮੀਨਾਂ 'ਤੇ ਕਬਜ਼ਾ ਕਰਨ ਲਈ ਉੱਠੇ ਅਖੌਤੀ ਕਿਸਾਨ ਵਿਦਰੋਹਾਂ ਨੂੰ ਦਬਾਉਣ ਆਈਆਂ ਰਾਜ ਦੀਆਂ ਹਥਿਆਰਬੰਦ ਤਾਕਤਾਂ ਦਾ ਗੁਰੀਲਾ ਜੰਗ ਰਾਹੀਂ ਸਫਾਇਆ ਕਰਨ ਦੇ ਕਾਰਜ ਨੂੰ ਪ੍ਰਣਾਈ ਤਾਕਤ ਵਿੱਚ ਪਲਟਣ ਦੀ ਗੱਲ ਕਰਨੀ ਇੱਕ ਭਰਮ ਤੋਂ ਸਿਵਾਏ ਹੋਰ ਕੁੱਝ ਨਹੀਂ ਹੈ। 
ਇਸ ਲਈ, ਕਿਸਾਨ ਜਥੇਬੰਦੀ ਰਾਹੀਂ ''ਹਥਿਆਰਬੰਦ ਜ਼ਰੱਈ ਜੰਗ''/''ਕਿਸਾਨ ਜੰਗ'' ਖੜ•ੀ ਕਰਨ ਦੀ ਵਕਾਲਤ ਕਰਦੀ ਇਹ ਸਮਝ ਇੱਕ ਸੱਜੀ ਮੌਕਾਪ੍ਰਸਤ ਸਮਝ ਹੈ। ਇਹ ਸਮਝ ਗੈਰ-ਕਾਨੂੰਨੀ, ਗੁਪਤ ਅਤੇ ਹਥਿਆਰਬੰਦ ਘੋਲ (ਜਾਂ ਉਸਦੀ ਐਨ ਸ਼ੁਰੂ ਤੋਂ ਤਿਆਰੀ) ਨੂੰ ਪ੍ਰਮੁੱਖ ਸਮਝਣ ਦੀ ਬਜਾਇ, ਕਾਨੂੰਨੀ, ਖੁੱਲ•ੀਆਂ ਅਤੇ ਪੁਰਅਮਨ ਸਰਗਰਮੀਆਂ/ਘੋਲਾਂ ਨੂੰ ਪ੍ਰਮੱਖ ਸਮਝ ਕੇ ਚੱਲਦੀ ਹੈ। ਇਹ ਗੁਪਤ ਅਤੇ ਗੈਰ-ਕਾਨੂੰਨੀ ਹਥਿਆਰਬੰਦ ਤਾਕਤ ਤੇ ਜਥੇਬੰਦੀ ਦੀ ਉਸਾਰੀ ਨੂੰ ਪ੍ਰਮੁੱਖ ਹੈਸੀਅਤ ਮੁਹੱਈਆ ਕਰਨ ਦੀ ਬਜਾਇ ਖੁੱਲ•ੀ ਅਤੇ ਕਾਨੂੰਨੀ ਵਲਗਣਾਂ ਵਿੱਚ ਕੈਦ ਕਿਸਾਨ ਜਥੇਬੰਦੀ ਦੀ ਉਸਾਰੀ ਨੂੰ ਪ੍ਰਮੁੱਖਤਾ ਮੁਹੱਈਆ ਕਰਕੇ ਚੱਲਦੀ ਹੈ। ਇਹ ਹਥਿਆਰਬੰਦ ਕਿਸਾਨ ਘੋਲ ਦੀ ਬਜਾਇ ਸ਼ਾਂਤਮਈ ਕਿਸਾਨ ਘੋਲਾਂ ਨੂੰ ਇਨਕਲਾਬੀ ਜਮਾਤੀ ਘੋਲ ਦੀ ਪ੍ਰਮੁੱਖ ਸ਼ਕਲ ਸਮਝ ਕੇ ਚੱਲਦੀ ਹੈ। 
ਇਉਂ, ਇਸ ਸੱਜੀ ਮੌਕਾਪ੍ਰਸਤ ਸਮਝ ਦੇ ਵਕੀਲਾਂ ਵੱਲੋਂ ਇਹ ਧੁਮਾਇਆ ਜਾਂਦਾ ਹੈ ਕਿ ਅਜੇ ਕਿਸਾਨ ਨਾ ਚੰਗੀ ਤਰ•ਾਂ ਜਥੇਬੰਦ ਹਨ ਅਤੇ ਨਾ ਹੀ ਇਨਕਲਾਬੀ ਚੇਤਨਾ ਨਾਲ ਲੈਸ ਹਨ। ਇਸ ਕਰਕੇ ਅੱਜ ਭਾਰਤ ਅੰਦਰ ਹਥਿਆਰਬੰਦ ਜ਼ਰੱਈ ਜੰਗ ਦੀਆਂ ਗੱਲਾਂ ਖੱਬੀ ਮਾਰਅਰਕੇਬਾਜ਼ੀ ਹਨ। ਕਿਸੇ ਵੇਲੇ ਸੀ.ਪੀ.ਆਈ. ਅਤੇ ਸੀ.ਪੀ.ਐਮ. ਦੀਆਂ ਸੋਧਵਾਦੀ ਅਤੇ ਨਵ-ਸੋਧਵਾਦੀ ਲੀਡਰਸ਼ਿੱਪਾਂ ਵੱਲੋਂ ਭਾਰਤ ਅੰਦਰ ਹਥਿਆਰਬੰਦ ਘੋਲ ਦੀ ਤਿਆਰੀ ਕਰਨ ਅਤੇ ਇਸਦੀ ਸ਼ੁਰੂਆਤ ਕਰਨ ਦੀ ਲੋੜ ਨੂੰ ਇਹ ਕਹਿ ਕੇ ਟਾਲਿਆ ਜਾਂਦਾ ਸੀ ਕਿ ਮੁਲਕ ਦੇ ਲੋਕ ਚੇਤਨਾ ਪੱਖੋਂ ਬਹੁਤ ਪਿੱਛੇ ਖੜ•ੇ ਹਨ। ਇਸ ਲੋੜ ਨੂੰ ਹੁੰਗਾਰਾ ਦੇਣ ਵਾਲਿਆਂ ਨੂੰ ਖੱਬੂ ਚੱਕਵੇਂ ਅਤੇ ਮਾਅਰਕੇਬਾਜ਼ ਗਰਦਾਨਿਆ ਜਾਂਦਾ ਸੀ। ਅੱਜ ਨਕਸਲੀ ਖੇਮੇ ਵਿਚ ਦੜੀ ਇਹ ਡੀ.ਵੀ.ਰਾਓ-ਨਾਗੀ ਰੈਡੀ ਮਾਅਰਕਾ ਸੱਜੀ ਮੌਕਾਪ੍ਰਸਤ ਸਮਝ ਐਨ ਉਹੀ ਦਲੀਲਾਂ ਦੇ ਠੁੰਮਣਿਆਂ ਦਾ ਆਸਰਾ ਲੈ ਰਹੀ ਹੈ। ਇਸ ਸਮਝ ਮੁਤਾਬਕ ਲੋਕ ਅਤੇ ਕਿਸਾਨ ਜਥੇਬੰਦੀ ਅਜੇ ਚੇਤਨਾ ਪੱਖੋਂ ਬਹੁਤ ਪਿੱਛੇ ਖੜ•ੇ ਹਨ। ਭਾਰਤ ਦੇ ਆਦਿਵਾਸੀ ਖਿੱਤੇ ਅੰਦਰ ਸੀ.ਪੀ.ਆਈ. (ਮਾਓਵਾਦੀ) ਦੀ ਅਗਵਾਈ ਵਿੱਚ ਲੜੀ ਜਾ ਰਹੀ ਕਿਸਾਨ ਲੜਾਈ ਖੱਬੀ ਮਾਅਰਕੇਬਾਜ਼ੀ ਹੈ, ਜਿਹੜੀ 1969-70 ਵਿੱਚ ਚਾਰੂ ਮਾਜ਼ੂਮਦਾਰ ਦੀ ਖੱਬੀ ਮੌਕਾਪ੍ਰਸਤ ਲੀਹ ਦਾ ਹੀ ਜਾਰੀ ਰੂਪ ਹੈ। 
ਇਸ ਸੱਜੀ ਮੌਕਾਪ੍ਰਸਤ ਸਮਝ ਨੂੰ ਜਨਮ ਧਾਰਿਆਂ ਅੱਜ ਲੱਗਭੱਗ 45 ਵਰਿ•ਆਂ ਤੋਂ ਉੱਪਰ ਹੋ ਚੱਲੇ ਹਨ। ਇਸ ਸਮਝ ਦੇ ਵਕੀਲ ਇਸ ਸਮਝ ਨੂੰ ਇੱਕੋ ਇੱਕ ਦਰੁਸਤ ਇਨਕਲਾਬੀ ਲੀਹ ਮੰਨਦੇ ਹਨ ਅਤੇ ਆਪਣੇ ਆਪ ਨੂੰ ਨਕਸਲਬਾੜੀ ਕੈਂਪ ਦਾ ਇੱਕੋ ਇੱਕ ਦਰੁਸਤ ਪ੍ਰੋਲੇਤਾਰੀ ਰੁਝਾਨ ਮੰਨਦੇ ਹਨ। ਪਰ ਅੱਜ ਤੱਕ ਇਸ ਸਮਝ ਦੇ ਅਲੰਬਰਦਾਰਾਂ ਵੱਲੋਂ ਕਿਤੇ ਵੀ ਜਾਗੀਰਦਾਰਾਂ ਦੀ ਜ਼ਮੀਨਾਂ 'ਤੇ ਕਬਜ਼ਾ ਕਰਨ ਲਈ ਅਖੌਤੀ ''ਕਿਸਾਨ ਵਿਦਰੋਹ'' ਉਠਾਉਣ ਦਾs  s'ਕ੍ਰਿਸ਼ਮਾ' ਨਹੀਂ ਦਿਖਾਇਆ ਗਿਆ। ਅਸਲ ਵਿੱਚ ਨਾ ਹੀ ਅਜਿਹੇ ਅਖੌਤੀ ਕਿਸਾਨ ਵਿਦਰੋਹਾਂ ਨੇ ਉੱਠਣਾ ਹੈ ਅਤੇ ਨਾ ਹੀ ਇਹਨਾਂ ਮੁਤਾਬਕ ਹਥਿਆਰਬੰਦ ਘੋਲ ਦੀ ਤਿਆਰੀ ਦਾ ਵਕਤ ਆਉਣਾ ਹੈ। ''ਨਾ ਨੌਂ ਮਣ ਤੇਲ ਹੋਣਾ, ਨਾ ਰਾਧਾ ਨੇ ਨੱਚਣਾ।'' ਇੱਕੜ-ਦੁੱਕੜ ਥਾਵਾਂ 'ਤੇ ਕਮਿਊਨਿਸਟ ਇਨਕਲਾਬੀ ਲਹਿਰ ਦੀ ਲੋੜੀਂਦੀ ਤਕੜਾਈ ਦੀ ਹਾਲਤ ਨਾ ਹੋਣ ਕਰਕੇ ਇਸ ਸਮਝ ਦੇ ਪੈਰੋਕਾਰਾਂ ਦਾ ਤੋਰੀ-ਫੁਲਕਾ ਚੱਲਦਾ ਹੈ। ਰੁਤਬਾਪ੍ਰਸਤ ਝੱਸ ਪੂਰੀ ਹੁੰਦੀ ਹੈ। ਇਸ ਝੱਸ ਦੀ ਪੂਰਤੀ ਅਤੇ ਤੋਰੀ-ਫੁਲਕਾ ਤੋਰਨ ਦੀ ਧੁੱਸ ਵਿੱਚੋਂ ਪੁਰਅਮਨ ਰੈਲੀਆਂ-ਧਰਨਿਆਂ ਨੂੰ ਜਥੇਬੰਦ ਕਰਦੇ ਰਹਿਣਾ ਹੈ। ਗਰੀਬੀ, ਕੰਗਾਲੀ ਅਤੇ ਹਕੂਮਤੀ ਧੱਕੇ-ਧੋੜਿਆਂ ਦੇ ਝੰਬੇ ਕਿਸਾਨਾਂ ਦੀਆਂ ਲੋੜਾਂ ਅਤੇ ਮਜਬੂਰੀਆਂ ਨੇ ਉਹਨਾਂ ਦੇ ਕੁੱਝ ਹਿੱਸਿਆਂ ਨੂੰ ਇਸ ਗੁਮਰਾਹੀ ਸਮਝ ਦੀ ਭੁੱਲ-ਭੁਲੱਈਆਂ ਵਿੱਚ ਭਟਕਦੇ ਰਹਿਣ ਦਾ ਆਧਾਰ ਮੁਹੱਈਆ ਕਰਦੇ ਰਹਿਣਾ ਹੈ। 
ਇਸ ਲਈ, ਮਾਓ-ਵਿਚਾਰਧਾਰਾ ਨੂੰ ਪ੍ਰਣਾਈਆਂ ਅਤੇ ਨਕਸਲਬਾੜੀ ਦੀ ਇਨਕਲਾਬੀ ਵਿਰਾਸਤ 'ਤੇ ਪਹਿਰਾ ਦੇ ਰਹੀਆਂ ਸਭਨਾਂ ਕਮਿਊਨਿਸਟ ਇਨਕਲਾਬੀ ਤਾਕਤਾਂ ਦਾ ਇਹ ਇੱਕ ਅਹਿਮ ਕਾਰਜ ਬਣਦਾ ਹੈ ਕਿ ਉਹਨਾਂ ਨੂੰ ਸੱਜੇ ਸੋਧਵਾਦ ਦੀਆਂ ਵੱਖ ਵੱਖ ਵੰਨਗੀਆਂ ਖਿਲਾਫ ਜੱਦੋਜਹਿਦ ਕਰਦਿਆਂ, ਖੱਬੀ ਫੰਡਰ-ਲਫਾਜ਼ੀ ਦੇ ਗਿਲਾਫ਼ ਵਿੱਚ ਦੜੀ ਸੱਜੀ ਮੌਕਾਪ੍ਰਸਤ ਲੀਹ ਅਤੇ ਸੱਜੇ ਸੋਧਵਾਦ ਦੀ ਇਸ ਵੰਨਗੀ ਦੀ ਰਹਿੰਦ-ਖੂੰਹਦ ਖਿਲਾਫ ਬੇਕਿਰਕ ਜੱਦੋਜਹਿਦ ਵੱਲ ਵੀ ਬਣਦੀ ਤਵੱਜੋ ਦਿੱਤੀ ਜਾਵੇ। ੦-੦